Ярмошына скардзіцца на байкот «выбараў»

Старшыня ЦВК расказала, што беларусы не хочуць ісці на «выбары».

Па словах Лідзіі Ярмошынай, грамадзяне на першым этапе цяперашняй выбарчай кампаніі «даволі пасіўныя». Пра гэта яна паведаміла падчас анлайн-канферэнцыі на сайце БелТА.

«Пакуль большая частка заяўнікаў, якія звяртаюцца ў Цэнтральную выбарчую камісію, спрабуе вырашыць асабістыя пытанні. То бок, у нас такое састарэлае стаўленне: калі вы не вырашыце нашы пытанні - мы на выбары не пойдзем. Тут я адразу ж магу сказаць: часы, калі кагосьці ўгаворвалі хадзіць на выбары, даўно ў мінулым», - сказала кіраўнік ЦВК. Яна звярнула ўвагу, што ўдзел у выбарах з'яўляецца асабістым, нязменным і неперадаваным правам кожнага грамадзяніна - ён можа ім скарыстацца альбо не скарыстацца, незалежна ад рашэння пытанняў, піша «Народная воля».

Лідзія Ярмошына канстатавала, што выбарчыя камісіі не маюць права ўмешвацца ў працу іншых дзяржаўных органаў, тым больш судоў.

«Часта нам матэрыялы якой-небудзь грамадзянскай судовай справы дасылаюць. На гэта ёсць спецыяльны парадак і заканадаўства, не звязанае з выбарчым. Таму мы і дапамагчы грамадзяніну зусім не можам», - заўважыла старшыня Цэнтрвыбаркама.