Gazeta Wyborcza: Лукашэнка і Пуцін запалохваюць Украіну

Менск падключыўся да кампаніі ціску Крамля на Кіеў.

Сумесныя беларуска-расейскія вучэнні пачаліся ў пятніцу на тэрыторыі Беларусі. Па заявах афіцыйнага Менска, яны з'яўляюцца рэакцыяй на павелічэнне прысутнасці НАТА ў Польшчы і краінах Балтыі. Аднак незалежныя эксперты не сумняюцца, што на самой справе гаворка ідзе аб дадатковым інструменце ціску на Украіну, піша Gazeta Wyborcza (пераклад - charter97.org).

У рамках выпрабаванняў беларуска-расейскай сістэмы супрацьпаветранай абароны адпрацоўвалася сумеснае процідзеянне атацы з паветра. Беларускія зенітныя падраздзяленні былі пераведзеныя ў стан баявой гатоўнасці і кантралявалі паветраную прастору Беларусі. Расейскія Су-27 разам з беларускімі МіГамі адпрацоўвалі перахоп самалётаў праціўніка і ахову транспартных самалётаў. У манеўрах таксама ўдзельнічаў расейскі паветраны радыёлакацыйны выведнік вялікі далёкасці А-50.

- У вучэннях узяла ўдзел практычна ўся авіяцыя, размешчаная на ўсіх дзяжурных аэрадромах Беларусі, - заявіў кіраўнік манеўраў палкоўнік беларускай арміі Андрэй Дзіканёў.

- Вучэнні азначаюць, што Расея спрабуе ўцягнуць у агрэсію супраць Украіны іншыя дзяржавы, - адзначыў прэс-сакратар украінскага МЗС Яўген Перабейнас.

Яму адказала Міністэрства замежных спраў Беларусі, якое запэўніла, што манеўры не накіраваныя супраць Украіны, а з'яўляюцца рэакцыяй на павелічэнне прысутнасці НАТА паблізу межаў Беларусі.

Акрамя вучэнняў сіл СПА, у пятніцу на Гожскім палігоне паблізу мяжы з Польшчай былі праведзеныя манеўры сухапутных войскаў. Па словах Міністэрства абароны Беларусі, яны былі планавымі і ў іх рамках бранетанкавыя войскі, якія належаць да падраздзяленняў Заходняга аператыўнага камандавання беларускай арміі, адпрацоўвалі вядзенне агню.

- Відавочна, што ініцыятыва іх правядзення зыходзіла ад Расеі. Гэта частка кампаніі ціску, якую Крэмль вядзе ў адносінах да Украіны. Лукашэнка паводзіў сябе, як верны саюзнік Расеі, і паказаў, што нягледзячы на заявы аб прызнанні тэрытарыяльнай цэласнасці Украіны, гатовы рухацца ў кірунку, паказаным Крамлём, - перакананы палітолаг Павел Усаў.