Пуцін падпісаў дамову аб акупацыі Крыма

Дамова аб уключэнні паўвострава ў склад Расеі падпісаная ў Крамлі.

Прэзідэнт Расеі Уладзімір Пуцін і самаабвешчаныя прадстаўнікі крымскіх уладаў - «кіраўнік урада» Сяргей Аксёнаў, спікер распушчанага Вярхоўнай Радай крымскага парламента Уладзімір Канстанцінаў і «мэр» Севастопаля Аляксей Чалы сакавіка 18 падпісалі дамову аб уключэнні Крыма і Севастопаля ў склад Расеі ў якасці новых суб'ектаў.

Цяпер расейскі парламент павінен ратыфікаваць гэтую дамову. Яшчэ адным этапам акупацыі Крыма стане змяненне Канстытуцыі РФ. Раней у аўторак Пуцін даручыў дэпутатам распрацаваць адпаведныя папраўкі.

У дамове сказана, што Крым лічыцца прынятым у Расею з даты падпісання дакумента. У адпаведнасці з дакументам у РФ з'явяцца два новых суб'екта: Рэспубліка Крым і горад федэральнага значэння Севастопаль, піша Lenta.ru.

Да 1 студзеня 2015 года ўстанаўліваецца пераходны перыяд, на працягу якога новыя суб'екты будуць інтэграваныя ў прававую, эканамічную, фінансавую і крэдытную сістэмы Расеі. Бліжэйшыя выбары ў Крыме пройдуць у верасні 2015 года.

Згодна з дакументам, усе грамадзяне Украіны і асобы без грамадзянства, якія пастаянна пражываюць у Крыме, атрымліваюць расейскае грамадзянства. Тыя, хто хоча пакінуць ранейшы пашпарт, павінны ў бліжэйшы месяц заявіць пра сваё жаданне.

17 сакавіка самаабвешчаныя ўлады Крыма абвясцілі аб сваёй незалежнасці. Гэта рашэнне яны абгрунтавалі «рэферэндумам», падчас якога нібыта больш за 96 адсоткаў жыхароў аўтаноміі прагаласавалі за далучэння да Расеі. Украінскія ўлады, ЗША і Еўразвяз заявілі пра незаконнасць галасавання і адмовіліся прызнаць яго вынікі.