Украінская армія пачынае антытэрарыстычную аперацыю на Данбасе

У Данецкай вобласці сканцэнтраваныя сілы і сродкі, неабходныя для правядзення антытэрарыстычнай аперацыі.

Пра гэта паведаміў кіраўнік Цэнтра ваенна-палітычных даследаванняў Дзмітрый Тымчук на сваёй старонцы ў сацыяльнай сетцы «Фэйсбук».

«У раёне правядзення аперацыі з учорашняга вечара працуе кіраўніцтва АТА. Вызначаныя першачарговыя мэты аперацыі, распрацаваны і пачаў рэалізоўвацца план яе правядзення. Пры распрацоўцы плана была пастаўленая першачарговая задача пазбегнуць ахвяраў сярод мірнага насельніцтва. Хоць, улічваючы шырокае прыцягненне да акцый сепаратыстаў мясцовага насельніцтва, такіх гарантый даць немагчыма», - паведаміў Тымчук.

Паводле яго слоў, на час правядзення аперацыі мабільная сувязь і радыёсувязь у раёне яе правядзення будзе блакаваная.

«Лідары сепаратыстаў атрымалі ад сваіх расейскіх каардынатараў арыентацыю на паўтор «данецкага» сцэнара (у выпадку яго поспеху) ў суседніх рэгіёнах. Ужо на дадзены момант адзначаюцца спробы пранікнення груп экстрэмістаў з Данецкай у суседнія вобласці. Гэтыя спробы спыняюцца мясцовымі праваахоўнікамі і сіламі мясцовай самаабароны», - адзначыў ён.

Тымчук таксама паведаміў, што ў прымежных рэгіёнах Украіны ўзмоцнены рэжым аховы дзяржаўнай мяжы з Расеяй. Тут жа часткамі і падраздзяленнямі Узброеных сіл Украіны выбудаваная паласа абароны, выкананыя задачы яе інжынернага забеспячэння, створаная эшаланаваная сістэма супрацьпаветранай абароны. Часткі Узброеных сіл Украіны прыведзеныя ў поўную баявую гатоўнасць.

Нагадаем, ва Украіне абвешчана пра пачатак шырокамаштабнай антытэрарыстычнай аперацыі пры ўдзеле Узброеных сіл. У нядзелю в.а. прэзідэнта Аляксандр Турчынаў падпісаў указ аб увядзенні ў дзеянне рашэння СНБА па правядзенню ў краіне антытэрарыстычнай спецаперацыі, якое не выдаецца. Вайскоўцы Узброеных сіл Украіны прыведзеныя ў поўную баявую гатоўнасць.

З 10 красавіка расейскія дыверсійныя групы і мясцовыя сепаратысты пачалі планамерныя захопы будынкаў мясцовых адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.

Фотa: Коммерсантъ