Расея перакінула на Данбас сотні новых дыверсантаў

Баевікі маюць добры ўзровень падрыхтоўкі і практыку баявых дзеянняў у «гарачых кропках».

Пра гэта журналістам на вызваленым ад захопнікаў Краматорскім аэрадроме сказаў першы намеснік старшыні СБУ кіраўнік Антытэрарыстычнага цэнтра Васіль Крутаў, перадае УНІАН.

«Я назаву літаральна дзве лічбы, якія даюць аператыўныя падраздзяленні спецыяльных службаў Украіны. Пазаўчора было 150 чалавек, якіх называюць «зялёнымі чалавечкамі», учора дадалося 300 такіх. Я не кажу, колькі было да гэтага часу. Прыкладна такія лічбы. Як будзе заўтра - пакажа жыццё», - сказаў Крутаў. На пытанне, якім чынам гэтыя людзі трапляюць на тэрыторыю Украіны, ён сказаў: «Для прафесіянала прайсці мяжу - гэта ўсё роўна, што нам у дзяцінстве было ў кіно схадзіць. Таму, што тут абмяркоўваць?»

Крутаў падкрэсліў, што ва Украіне дзейнічаюць надзвычай прафесійныя і падрыхтаваныя спецназаўцы, якія маюць вопыт працы ў шматлікіх гарачых кропках. «Мы сапраўды маем справу з вельмі сур'ёзным, кваліфікаваным, прафесійным апанентам. Нажаль, павінны падкрэсліць, што яны дзейнічаюць досыць прафесійна. Трэба аддаць належнае - добры ўзровень падрыхтоўкі, веданне тактыкі, практыка - дастаткова высокая. Гэтыя людзі ўжо бывалі ў многіх гарачых кропках. Там усё няпроста», - канстатаваў Крутаў.

Кіраўнік АТЦ таксама абверг інфармацыю пра тое, што сёння падчас вызвалення аэрадрома ў Краматорску былі пацярпелыя з боку ўкраінскіх вайскоўцаў і з боку захопнікаў ваеннага аб'екта. Крутаў падкрэсліў, што ад маральнай падрыхтоўкі і баявога духу вайскоўцаў Украіны ў перспектыве будзе залежаць поспех антытэрарыстычнай аперацыі. «Афіцэр - чалавек апрыёры той, які прыходзіць у прафесію ваеннага чалавека ўжо загадзя для сябе вызначыўшы, што за гэтую прафесію ён не толькі можа пакласці сваё здароўе, але і жыццё. Гэта правільная армія, гэта правільныя ваяры. Тады любая дзяржава, якой бы яна бедным і складаным, як сёння ў нас ва Украіне, не было, яно заўсёды мае неперасягненую перспектыву развіцця», - адзначыў Крутаў.

Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.

У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.

15 красавіка ў выніку аперацыі ўкраінскіх сілавікоў быў вызвалены захоплены расейскімі дыверсантамі і сепаратыстамі горад Краматорск на поўначы Данецкай вобласці.