Турб'ерн Ягланд: У Еўропе найбуйнейшы крызіс правоў чалавека з часоў халоднай вайны
7- 16.04.2014, 15:57
- 16,580
Генеральны сакратар Рады Еўропы прадставіў даклад аб стане правоў чалавека на кантыненце.
Дакумент таксама закранае пытанні дэмакратыі і вяршэнства права ў еўрапейскіх краінах. Сённяшнюю сітуацыю генеральны сакратар Рады Еўропы ахарактарызаваў як «найбуйнейшы крызіс правоў чалавека з часоў заканчэння халоднай вайны». Пра гэта сайту charter97.org паведамілі ў прэс-службе Турб'ерна Ягланда.
У дакладзе адзначаецца, што ў шэрагу еўрапейскіх дзяржаў адбываюцца «сур'ёзныя парушэнні правоў чалавека, назіраецца рост карупцыі, квітнее гандаль людзьмі, развіваюцца расісцкія і дыскрымінацыйныя погляды». «Беспрацоўе і беднасць у многіх краінах сталі крыніцамі экстрэмізму і канфрантацыі», - адзначаецца ў дакуменце.
У ліку іншых канфліктных рэгіёнаў у Еўропе Ягланд згадаў і сітуацыю ва Украіне і ваенную агрэсію Расеі ў Крыме. «Адсутнасць дэмакратычных стрымак і проціваг, свабодных СМІ і незалежнай судовай сістэмы спарадзіла паўсюдную карупцыю і прывяла да злоўжывання ўладай», - лічыць генеральны сакратар, кажучы пра прычыны развязвання вайны Крамлём.
Ён звярнуўся да 47 дзяржаў-сяброў РЕ з заклікам спыніць разбурэнне фундаментальных правоў і працягнуць рэфармаванне еўрапейскай адзінай канвенцыяльнай сістэмы.
«Еўропа мае патрэбу ў новым агульнаеўрапейскім парадку дня бяспекі, які павінен уключаць абарону вяршэнства права і дэмакратычных прынцыпаў. Разам мы павінны дамагчыся вяртання Еўропы на шлях адзінства і супрацоўніцтва, заснаваны на агульных каштоўнасцях, стандартах і прававых абавязацельствах», - сказаў генеральны сакратар Рады Еўропы.
У дакладзе змяшчаецца шэраг рэкамендацый аб тым, як арганізацыя можа даць больш аператыўную і эфектыўную дапамогу сваім 47 дзяржавам-сябрам. Гэтае пытанне будзе абмяркоўвацца на пасяджэнні Камітэта міністраў замежных спраў Рады Еўропы 6 траўня ў Вене.