13,5 тысяч «турыстаў Пуціна» не пусцілі ва Украіну

Украіна ўзмацніла меры памежнага кантролю пры ўездзе грамадзян Расейскай Федэрацыі.

Дзяржаўная памежная служба Украіны ўводзіць для расейцаў памежны кантроль другой лініі, грамадзян РФ будуць прапускаць праз мяжу толькі пасля праверкі Службай бяспекі і МУС.

Пра гэта на брыфінгу паведаміў начальнік аддзела па пытаннях узаемадзеяння з прэсай Дзяржпамежслужбы Алег Слабадзян, піша korrespondent.net.

«Улічваючы складаную сітуацыю на мяжы Украіны і на тэрыторыі мацерыковай часткі краіны, з учорашняга дня істотна ўзмоцненыя меры памежнага кантролю па ўездзе грамадзян Расейскай Федэрацыі», - сказаў Слабадзян.

Паводле яго слоў, у поле зроку памежнікаў трапляюць мужчыны, якія едуць у адзіночку ці ў складзе невялікіх груп, і жанчыны ў актыўным узросце.

«Усе грамадзяне, якія ўязджаюць з тэрыторыі Расеі, будуць паддавацца кантролю другой лініі - высвятленню мэты паездкі, куды і да каго яны едуць і іншых спадарожных дадзеных, якія будуць дэталёва правярацца сумесна з супрацоўнікамі СБУ і МУС. І толькі на падставе гэтага масіва інфармацыі будзе прымацца рашэнне аб пропуску або няпропуску ва Украіну», - адзначыў Слабадзян.

Паводле яго слоў, гаворка ідзе не пра татальную забарону, а пра ўзмацненне памежнага кантролю.

Слабадзян таксама адзначыў, што Дзяржпамежслужба рыхтуе тлумачэнні аб тым, якія дакументы могуць быць дадатковымі аргументамі пацверджання мэты знаходжання грамадзян Расеі ва Украіне, акрамя дакументаў, якія вызначаныя міжнароднымі дамовамі.

Па словах Слабадзяна, за апошнія два месяца на Украіну не ўпусцілі 13,5 тыс грамадзян РФ, у асноўным мужчын ва ўзросце ад 25 да 55 гадоў, 98 з іх забаронены ўезд на тэрыторыю Украіны на працяглы тэрмін.