Беларускі журналіст быў выкрадзены тэрарыстамі ў Славянску
5- 21.04.2014, 11:50
- 16,748
(абноўлена - 12:23) Журналіст Зміцер Галко каля гадзіны знаходзіўся ў палоне ў сепаратыстаў.
Пра сваё затрыманне сёння раніцай ён паспеў паведаміць у «Фэйсбуку».
Разам з ім былі затрыманыя італьянскія журналісты, паведаміў у сацыяльнай сетцы ўкраінскі журналіст Дзяніс Казанскі.
«У Славянску гадзіну таму сепаратыстамі былі выкрадзеныя два італьянскіх журналіста Поль Гаго і Касіма Атанасіо, а таксама беларускі журналіст газеты «Новы час» Зміцер Галко, якія вялі здымку ў горадзе. У журналістаў забралі дакументы, грошы і фотатэхніку, сядзяць у нейкім памяшканні. Інфармацыя ад іх», - напісаў ён.
Прыкладна праз гадзіну журналіст выйшаў на сувязь і паведаміў, што ўжо знаходзіцца на волі. Пра лёс італьянскіх журналістаў пакуль не паведамляецца.
Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.
У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.