Ілля Дабратвор арыштаваны на 10 сутак

Суддзя Заводскага раёна Менска Анастасія Осіпчык прысудзіла да арышту на 10 сутак актывіста Іллю Дабратвора.

Дабратвор быў затрыманы 22 красавіка, калі ён ехаў на ўласным аўтамабілі. Яго спынілі па падазрэнні ў нібыта згоне аўтамабіля. Супрацоўнікі міліцыі склалі на актывіста два адміністрацыйныя пратаколы: парушэнне артыкула 17.1 КоАП (дробнае хуліганства) і 23.4(непадпарадкаванне супрацоўнікам міліцыі). Ілля вёз у аўтамабілі ўкраінскія і бел-чырвона-белыя сцяжкі, усяго 30 штук, піша ПЦ «Вясна».

Сведкамі на працэсе выступілі супрацоўнікі міліцыі Пястрак і Кісялёў.

Па кожным артыкуле было вынесена пакаранне па 7 сутак арышту, аднак канчаткова, шляхам частковага складання, суддзя Осіпчык прысудзіла яго да арышту на 10 сутак.