«Абалонь» прыпыніла экспарт піва ў Беларусь

Карпарацыя "Абалонь" (Украіна) часова прыпыніла экспарт прадукцыі ў Беларусь да высвятлення працэдуры ліцэнзавання.

Пра гэта паведаміў БелаПАН начальнік аддзела карпаратыўных камунікацый карпарацыі Аксана Піражок на просьбу пракаментаваць рашэнне беларускага ўрада аб увядзенні ліцэнзавання імпарту піва з краін, якія не ўваходзяць у Мытны саюз.

"Пастаўкі прыпыненыя з мэтай зніжэння рызык для нашых беларускіх партнёраў, звязаных з прастоем грузу на мытні, і пазбягання неналежных умоў яго захоўвання ў гэты перыяд", - сказала Піражок.

Паводле яе слоў, кампанія толькі сёння атрымала пастанову Саўміна Беларусі №365 ад 18 красавіка 2014 года, "таму прагназаваць далейшыя аб'ёмы продажаў пакуль рана".

Як паведамлялася раней, Беларусь уводзіць ліцэнзаванне імпарту піва з-за межаў Мытнага саюза. Гэта прадугледжана пастановай Савета міністраў №365 ад 18 красавіка 2014 года. Ліцэнзаванне ўводзіцца на паўгода - з 1 траўня да 31 кастрычніка 2014 года. Згодна з дакументам, імпарт безалкагольнага і соладавага піва будзе ажыццяўляцца па разавых ліцэнзіях. Выдаваць іх будзе Міністэрства гандлю па ўзгадненні з канцэрнам "Белдзяржхарчпрам".

Міністэрству замежных спраў Беларусі даручана паведаміць Еўразійскую эканамічную камісію (ЕЭК) аб гэтай меры, а таксама ўнесці на разгляд ЕЭК прапанову аб прымяненні аналагічнай меры іншымі краінамі Мытнага саюза.

Зараз ліцэнзаванне імпарту піва ў Беларусь не ажыццяўляецца. У сувязі з антыдэмпінгавым расследаваннем з 2010 па 2012 гады было ўведзенае ліцэнзаванне імпарту піва з Украіны.