The Wall Street Journal: У «чорны спіс» ЕЗ патрапяць яшчэ 15 расейцаў
2- 23.04.2014, 20:12
- 7,605
Новыя санкцыі ЕЗ у дачыненні да расейцаў у сувязі з крызісам на Украіне павінны закрануць яшчэ 15 чалавек.
Пра гэта распавялі The Wall Street Journal дыпламатычныя крыніцы. Пры гэтым ніводнага імя з гэтага спісу газэта даведацца не здолела, аднак журналістам стала вядома, што ў спісе ёсць крымчукі, піша NEWSru.com.
Аднак двое суразмоўцаў выдання пацвердзілі, што пакуль прынцыповая пастанова аб хуткім павелічэнні спісу не прынятая. Яны не выключылі, што ў залежнасці ад развіцця сітуацыі ўвядзенне новых санкцый могуць і прытрымаць.
Ёсць меркаванне, што Захад марудзіць з увядзеннем новай порцыі абмежаванняў для расейцаў, бо разважае аб правядзенні новай сустрэчы ў Жэнэве аб украінскім пытанні.
У "чорным спісе" ЕЗ, ужо павялічаным, змяшчаюцца 33 прозвішчы расейцаў і ўкраінцаў. Першую рэдакцыю санкцыйнага спісу Брусэль апублікаваў 17 сакавіка, на наступны дзень пасля рэферэндуму ў Крыме. У ім было 12 прозвішчаў украінцаў і расейцаў, сярод апошніх - дэпутаты, сэнатары, ваяводы. 21 сакавіка ЕЗ павялічыў "чорны спіс", уключыўшы ў яго і тэлевядоўцу Дзмітрыя Кісялёва, які некалькі месяцаў таму прабавіў з сям'ёй адпачынак у Еўропе, у прыватнасці - у Амстэрдаме. Цяпер кіраўніку дзяржаўнага міжнароднага агенцтва "Россия сегодня", які дакляруе ператварыць ЗША ў "радыеактыўны попел", забаронены ўезд у ЕЗ.
Прадстаўнікі 28 краін Еўрапейскага Звязу ў сярэдзіне красавіка на пасяджэнні ў Люксэмбургу прынялі прынцыповую пастанову зрабіць больш жорсткім санкцыі супраць расейскіх палітыкаў, чыноўнікаў і бізнэсоўцаў, якія маюць дачыненне да эскалацыі крызісу ва Украіне. Аднак з таго моманту абмежаванні так і не былі ўведзеныя.