Відэа штурму беларускай мяжы жыхаром Гродна на Citroen Jumper

З'явілася відэа таго, як гродзенец на фургоне з прабітымі коламі спрабаваў прарвацца праз мяжу.

Спробу прарвацца праз мяжу ў пункце пропуску Прывалка распачаў кіроўца Citroen Jumper. «Малады чалавек, які знаходзіўся за рулём, адмовіўся падаць дакументы вартавому, - распавёў onliner.by начальнік прэс-цэнтра Дзяржаўнага памежнага камітэта Аляксандр Цішчанка. - У наступны момант ён націснуў педаль газу і ірвануў у бок літоўскай тэрыторыі. На шляху збіў тры-чатыры шлагбаўма і ледзь не наехаў на некалькіх пешаходаў». Пазней ГПК апублікаваў запіс камер назірання.

«Прывалка лічыцца ў тым ліку і пешаходным пунктам пропуску, таму небяспека аварыі была высокая, - звярнуў увагу Аляксандр Цішчанка. - Нашы супрацоўнікі распачалі меры па прымусовым спыненні фургона - выкінулі на дарогу «вожыка». Колы Citroen апынуліся прабітымі, але кіроўца працягнуў рух. У гэты час беларускі бок апавясціў літоўскі пра набліжэнне парушальніка. Там яго, можна сказаць, ужо чакалі і ў выніку затрымалі. Пры гэтым малады чалавек аказаў супраціў».

Зараз асоба парушальніка ўстаноўленая - гэта жыхар Гродна 1988 года нараджэння. Разам з ім ехала пасажырка 1989 года нараджэння. «Да гэтага часу, больш чым праз 12 гадзін пасля інцыдэнту, кіроўца знаходзіцца ў неадэкватным стане, - дапоўнілі ў ДПК. - Ёсць падставы меркаваць, што ён знаходзіцца пад дзеяннем псіхаактыўных рэчываў. Узятыя матэрыялы на даследаванне. У дадзены момант ён знаходзіцца ў псіхіятрычным шпіталі. Характэрна, што нічога забароненага малады чалавек не перавозіў».

Па факце незаконнага перасячэння мяжы на аўтамабілі ўзбуджаная крымінальная справа. Парушальніку пагражае пазбаўленне волі на тэрмін да двух гадоў.