Мікалай Аўтуховіч: Турэмшчыкі дзейнічалі супраць мяне подла і баязліва
9- 8.04.2014, 11:00
- 20,167
Былы палітвязень Аўтуховіч у бліжэйшы час збіраецца паправіць здароўе.
Пра гэта ён паведаміў у інтэрв'ю сайту charter97.org пасля вызвалення з Гродзенскай турмы №1.
«Умовы ў турме былі жорсткімі і яны такія для ўсіх. Я б сказаў, што адміністрацыя ставілася да мяне не жорстка, а подла, гэта значыць калі нешта рабіла, то з-за кута», - сказаў ён.
Былы палітвязень адзначыў, што яму два разы прапаноўвалі напісаць прашэнне на імя Лукашэнкі, але ён адмовіўся, бо для яго гэта непрымальна.
«Сёння я цэлы дзень займаюся здароўем, здаю аналізы. Пасля гэтага будзем глядзець, што атрымаецца вылечыць, а што не. Задумкі і планы на бліжэйшую будучыню ёсць, але казаць пра іх пакуль што не хачу», - дадаў Мікалай Аўтуховіч.
Нагадаем, Мікалай Аўтуховіч сёння ў 8 гадзін раніцы выйшаў на волю з гродзенскай турмы, дзе ён адседзеў 5 гадоў і 2 месяцы за перавозку і захоўванне пяці патронаў да паляўнічай вінтоўкі. Праваабаронцы прызналі яго палітвязнем, асуджаным за сваю актыўную грамадскую дзейнасць і барацьбу з карупцыяй.
У студзені 2012 года суд зрабіў больш жорсткімі Аўтуховічу ўмовы адбыцця пакарання, прызнаўшы яго «злосным парушальнікам рэжыму». Асуджанага перавялі з калоніі №5 у Івацэвічах у Гродзенскую турму №1.
Пасля вызвалення над палітвязнем Мікалаем Аўтуховічам на 16 месяцаў будзе ўстаноўлены прэвентыўны нагляд.
Фота: belsat.eu