З 1 ліпеня ІП не выйдуць на працу

250 прадпрымальнікаў з усёй Беларусі правялі форум у Менску.

Пра гэта сайту charter97.org паведаміў старшыня Савета РГА «Перспектыва» Анатоль Шумчанка.

«7 красавіка ў Менску прайшоў форум прадпрымальнікаў, на якім прысутнічала каля 250 чалавек з усіх рэгіёнаў і сталіцы. На мерапрыемстве былі абмеркаваныя праблемныя пытанні, а па яго выніках прынятая рэзалюцыя, якая будзе адпраўленая беларускім уладам. Сутнасць яе ў тым, што ўдзельнікі форуму не падтрымалі прадастаўлены для абмеркавання Міністэрствам па падатках і зборах праект указа Лукашэнкі «Аб некаторых пытаннях рэгулявання прадпрымальніцкай дзейнасці і рэалізацыі тавараў індывідуальнымі прадпрымальнікамі і іншымі фізічнымі асобамі», за выключэннем пункта 2, выкладзенага ў наступнай рэдакцыі: «для заняцця прадпрымальніцкай дзейнасцю ў якасці індывідуальнага прадпрымальніка грамадзянін мае права прыцягваць не больш трох фізічных асоб па працоўных і (або) грамадзянска-прававых дамовах», - падкрэсліў ён.

Лідар «Перспектывы» адзначыў, што іншымі словамі, прадпрымальнікі заклікалі ўладу пакінуць усё як ёсць.

«ІП і без таго стала цяжка прадаваць тавары. А калі ўвядуць усе гэтыя новыя рэгламенты і ўказы, то кошты прыйдзецца яшчэ больш павысіць. Але справа нават не ў гэтым. Усе сышліся на тым, што прадпрымальнікі не змогуць працаваць з 1 ліпеня з сертыфікатамі і суправаджальнымі дакументамі. Гэта значыць для 90% гэта будзе нерэальна. І адказнасць за гэта будзе несці Пракаповіч, які з'яўляецца ініцыятарам усіх гэтых спраў. Таму на сённяшні дзень выхад з гэтай сітуацыі можа быць толькі адзін - пакінуць усё як ёсць і не чапаць ІП», - заявіў Анатоль Шумчанка.

Нагадаем, індывідуальныя прадпрымальнікі крытыкуюць праект указа «Аб некаторых пытаннях рэалізацыі тавараў індывідуальнымі прадпрымальнікамі і іншымі фізічнымі асобамі». У прыватнасці, яны просяць не ўводзіць норму аб абавязковых суправаджальных дакументах для ІП, лічачы на сёння яе невыканальным патрабаваннем.