Прадпрымальнікам забаранілі гандаль без сертыфікатаў

Дыктатар падпісаў указ аб суправаджальных дакументах на тавары для ІП.

Аляксандр Лукашэнка падпісаў указ №222 «Аб рэгуляванні прадпрымальніцкай дзейнасці і рэалізацыі тавараў індывідуальнымі прадпрымальнікамі і іншымі фізічнымі асобамі», паведамляе прэс-служба беларускага дыктатара.

Для індывідуальных прадпрымальнікаў - плацельшчыкаў адзiнага падатку з 1 ліпеня 2014 года ўстанаўліваецца абавязак мець у наяўнасці на ўсе рэалізуемыя тавары, у тым ліку і на тавары, што ўвозяцца з краін Мытнага саюза, дакументы, якія пацвярджаюць набыццё (паступленне) гэтых тавараў.

Для індывідуальных прадпрымальнікаў - плацельшчыкаў адзінага падатку да 1 сакавіка 2015 устаноўлены пераходны перыяд, на працягу якога ім дадзена права рэалізаваць рэшткі тавараў, увезеных на тэрыторыю Рэспублікі Беларусь з тэрыторыі краін Мытнага саюза да 1 ліпеня 2014 года без дакументаў, якія пацвярджаюць іх набыццё (паступленне).

У гэтых мэтах індывідуальныя прадпрымальнікі паводле стану на 1 ліпеня 2014 года складаюць вопіс рэшткаў такіх тавараў па кожнаму гандлёваму і складскому аб'екту, які ў тэрмін да 30 ліпеня 2014 рэгіструюць у падатковым органе. У далейшым зарэгістраваныя вопісы захоўваюцца на гандлёвых аб'ектах да поўнай рэалізацыі рэшткаў тавараў.

Паколькі ў адпаведнасці з указам рэалізацыя рэшткаў тавараў з выплатай падатку на даданую вартасць у фіксаваных сумах будзе ажыццяўляцца да 1 сакавіка 2015 года, то з 1 сакавіка 2015 года з указу Лукашэнкі ад 18 чэрвеня 2005 года №285 «Аб некаторых мерах па рэгуляванні прадпрымальніцкай дзейнасці» выключаецца прадпісанне аб магчымасці выплаты падатку на даданую вартасць у фіксаваных сумах у дачыненні да тавараў, увезеных індывідуальнымі прадпрымальнікамі - плацельшчыкамі адзінага падатку з краін Мытнага саюза без таварасуправаджальных дакументаў.

Індывідуальныя прадпрымальнікі, якія будуць мець дакументы на ўсе рэалізуемыя тавары, у адпаведнасці з указам будуць мець права перайсці на спрошчаную сістэму падаткаабкладання альбо з 1 ліпеня, альбо з 1 кастрычніка 2014 года.

Акрамя таго, указам прадугледжаны канкрэтны пералік тавараў, рэалізацыя якіх будзе ажыццяўляцца фізічнымі асобамі без дакументаў, якія пацвярджаюць іх набыццё.

За рэалізацыю тавараў, не ўказаных у пераліку, для фізічных асоб прадугледжана адміністрацыйная адказнасць.

Адначасова з увядзеннем для індывідуальных прадпрымальнікаў - плацельшчыкаў адзінага падатку абавязкі па наяўнасці пацвярджаючых дакументаў на рэалізуемыя імі тавары індывідуальным прадпрымальнікам прадстаўляецца права прыцягваць да прадпрымальніцкай дзейнасці не больш за тры наёмныя асобы незалежна ад роднасных сувязяў.

Таксама здымаюцца абмежаванні па колькасці гандлёвых, абслугоўваючых і іншых аб'ектаў, якія выкарыстоўваюцца індывідуальнымі прадпрымальнікамі ў сваёй дзейнасці.