Жырыноўскі папрасіў Лукашэнку ўвесці войскі ва Украіну
161- 2.05.2014, 16:39
- 152,325
Лідар ЛДПР настойвае на акупацыі Украіны войскамі Беларусі і Расеі.
Уладзімір Жырыноўскі лічыць, што гэта трэба зрабіць да 9 траўня. «Тады краіна ўздыхне свабодна і зможа адсвяткаваць яшчэ адну перамогу», - сказаў «Русской службе новостей» лідар ЛДПР.
Ён паведаміў, што дэпутаты ўсіх фракцый Дзярждумы запатрабавалі ад ваенна-палітычнага кіраўніцтва РФ як мага хутчэй прыняць усе меры, каб спыніць карную аперацыю кіеўскіх уладаў.
«Наша кіраўніцтва прыме комплекс мер, каб забяспечыць бяспеку грамадзян паўднёва- усходу і прымусіць да адступлення усе ўзброеныя фармаванні», - упэўнены Жырыноўскі.
Па яго думку, не павінна заставацца ў баку і Беларусь, яна магла б увесці войскі ў паўночна-заходнія вобласці Украіны і дапамагчы заблакаваць сілы Кіева, якія пачалі непрыкрыты тэрор.
«Аперацыя, якую кіеўскія ўлады называюць контртэрарыстычнай, робіцца з мэтай пакінуць Украіну адзінай пад нацысцкім рэжымам і ўключыць яе ў НАТА, і затым дыверсійнымі атрадамі турбаваць нашы заходнія рэгіёны - Кубань, Варонеж, Растоў, Курск, Белгарад», - лічыць палітык.
Нагадаем, ва Узброеных Сілах Беларусі працягваецца праверка боегатоўнасці, распачатая са студзеня бягучага года па даручэнні Лукашэнкі. Першыя два месяца выпрабоўвалася гатоўнасць органаў кіравання, сегмента супрацьпаветранай абароны, а таксама органаў кіравання і падраздзяленняў тэрытарыяльнай абароны. Пасля гэтага правяралася адзіная рэгіянальная сістэма СПА Беларусі і Расеі.
Большая частка вучэнняў праводзіцца ля межаў з Украінай. У іх таксама бяруць удзел вайскоўцы з Расеі.