Мясніковіч загадаў калгаснікам працаваць без адпачынку

На перыяд нарыхтоўкі кармоў работнікам і кіраўнікам сельгасарганізацый трэба забыцца пра адпачынак.

Такое патрабаванне агучыў сёння на пасяджэнні Савета міністраў кіраўнік беларускага ўрада Міхаіл Мясніковіч, перадае БелТА.

«Ужо пачаўся перыяд нарыхтоўкі кармоў, таму даручаю адмяніць на гэты час усе адпачынкі і працяглыя камандзіроўкі адказных асоб, іншыя непершачарговыя мерапрыемствы, каб сканцэнтраваць усю ўвагу кадраў на выкананні тэхналогій і рэгламентаў нарыхтоўкі кармоў», - сказаў прэм'ер-міністр. Урад будзе ўдзячны, калі гэтыя пытанні возьме на свой кантроль Камітэт дзяржкантролю. Час угавораў выконваць рэгламенты і нарматывы, падкрэсліў прэм'ер, ужо прайшоў.

У цэлым, кажучы пра работу аграпрамысловага комплексу, Міхаіл Мясніковіч канстатаваў наяўнасць вялікай колькасці праблем. Асноўнай прычынай абуральных фактаў безгаспадарчасці, недаглядаў, якія выявілі кантралюючыя органы і міжведамасная рабочая група па вырашэнні праблемных пытанняў АПК, з'яўляюцца суб'ектыўныя фактары. Праблема, лічыць прэм'ер, у кадрах, якія ці не ўмеюць належным чынам весці гаспадарку, ці ведаюць, як гэта рабіць, але тым не менш не робяць.