Наталля Радзіна: Мы павінны супрацьстаяць крамлёўскай інфармацыйнай агрэсіі

Каб працаваць без цэнзуры, патрэбна народная падтрымка.

Чаму ў сайта «Хартыя'97» узнікла патрэба звярнуцца да чытачоў за фінансавай падтрымкай? «Радыё Свабода» паразмаўляла з рэдактарам партала Наталляй Радзінай, каб высветліць, чаму «Хартыя'97», якая існуе ўжо 16 гадоў, шукае матэрыяльнай дапамогі.

- Чаму ў сайта «Хартыя'97» узнікла патрэба звярнуцца да чытачоў за фінансавай падтрымкай?

- Патрэба з'явілася з-за таго, што ў некалькі разоў вырасла аўдыторыя сайта, і нам проста не хапае сродкаў для існавання. Мы вельмі ўдзячныя за тую дапамогу, якую атрымліваем і ад польскіх уладаў, і ад іншых партнёраў. Але, на жаль, з улікам таго, што працы стала ў разы больш, а мы не можам павялічваць штат, гэтай дапамогі недастаткова.

- Колькі цяпер налічвае аўдыторыя «Хартыі'97»?

- У пікавыя моманты да 500 тысяч унікальных карыстальнікаў за дзень. У сярэднім колькасць унікальных наведвальнікаў - гэта 300-400 тысяч за дзень і 4 мільёнаў унікальных наведвальнікаў за месяц.

- Як арганізаваная праца вашага сайта? Ці ёсць журналісты ў Беларусі?

- Ёсць журналісты, якія працуюць у Беларусі, ёсць крыніцы інфармацыі, ёсць аўтары, якія пішуць для нас артыкулы. Акрамя гэтага, развітая грамадзянская журналістыка, і мы атрымліваем шмат інфармацыі непасрэдна ад чытачоў, яна правяраецца журналістамі і публікуецца на сайце.

Людзі нам пішуць, бо ведаюць, што мы працуем без цэнзуры, без страху быць арыштаванымі, так як мы праз гэта ўжо прайшлі ў Беларусі. Я нагадаю, што заснавальнік сайта Алег Бябенін быў забіты, я сядзела ў турме. Сёння, калі галоўны офіс «Хартыі'97» - у Польшчы, мы маем магчымасць рабіць больш працы без страху падвергнуцца рэпрэсіям. Людзі гэта ведаюць і дасылаюць нам вельмі шмат інфармацыі пра тое, што адбываецца ў іх гарадах. Мы публікуем яе і ведаем, што ўлады вымушаныя рэагаваць.

- Па электроннай сістэме рэйтынгу сайтаў «Акавіта», ваш рэсурс - на першым месцы па наведвальнасці ў Беларусі. Чаго яшчэ вы хочаце дасягнуць ? Якім чынам вы плануеце развівацца?

- Ніколі нельга быць задаволеным тым, што ўжо дасягнута. Трэба імкнуцца да большага. Наконт «Акавіты» магу сказаць, што гэтая сістэма лічыць толькі беларускіх карыстальнікаў, а нас чытае вельмі шмат людзей з Украіны і Расеі. Таму, будучы беларускім сайтам, сёння мы сталі рэгіянальным праектам.

Мы маем намер працягваць сваю працу, таму што бачым, якая сітуацыя ў нашым рэгіёне. Мы павінны супрацьстаяць крамлёўскай інфармацыйнай агрэсіі, і тут я кажу не толькі пра «Хартыю'97», але і пра іншыя беларускія СМІ.

Я перакананая, што кожнае незалежнае медыя сёння сутыкаецца з тымі ж праблемамі, што і «Хартыя'97». Мы павінны ўсведамляць, што не можам працаваць ва ўмовах пастаяннай барацьбы за выжыванне. Мы павінны быць упэўненыя, што і заўтра працягнем сваю працу.