Актывісту прафсаюза РЭП з Мазыра не падоўжылі працоўны кантракт
3- 5.05.2014, 15:50
- 5,627
Актывіст незалежнага прафсаюза РЭП з Мазыра Павел Наздра атрымаў паведамленне, што працоўны кантракт з ім не будзе падоўжаны «ў сувязі са сканчэннем тэрміну дзеяння».
Актывіст працаваў электраманцёрам у ЖЭУ па працоўным кантракце з 2010 года, тэрмінам на чатыры гады, піша ПЦ «Вясна».
«Па працоўнай дзейнасці да мяне не было ніякіх прэтэнзій або заўваг. Мяне шанавалі як спецыяліста. Прычым цяпер у ЖЭУ не застанецца электрыкаў, наколькі я ведаю. Тое, што мне не падоўжылі кантракт, я звязваю са сваёй грамадскай дзейнасцю, таму што праблемы з кіраўніцтвам у мяне пачаліся ў мінулым годзе менавіта з-за стварэння структурнага падраздзялення незалежнага прафсаюза», - лічыць Павел Наздра.
Прадузятае стаўленне з боку кіраўніцтва пачалося, як адзначае актывіст, з восені 2013 года. «Але пасля публікацый у СМІ мне кіраўніцтва абяцала, што з працы мяне не звольняць, хоць да гэтага неаднаразова пагражалі, шукаючы розныя падставы», - дадаў актывіст прафсаюза. Цяпер ён будзе шукаць новую працу.