Сенатар Рон Джонсан: Пуцін зверне ўвагу толькі на сілу і рашучасць

Адмовіўшы Украіне ў прадастаўленні зброі, ЗША далі Маскве сігнал, што яна можа беспакарана працягваць агрэсію.

Пра гэта ў інтэрв'ю CNN заявіў сенатар-рэспубліканец Рон Джонсан, які ўваходзіць у Сенацкі камітэт па замежных справах, перадае "Лiга.нет".

"Усе санкцыі, усе пагрозы санкцый мелі вельмі слабы эфект. Уладзімір Пуцін зверне ўвагу толькі на ўчынкі, сілу і рашучасць. Словы на яго не паўплываюць. Менавіта гэта мы чуем ва Украіне", - заявіў ён.

На думку сенатара, слабасць рэакцыі ЗША на падзеі ва Украіне пераконвае Пуціна, што Амерыка не зацікаўленая ў яе абароне. "Лёгка даваць парады адносна мінулага, але калі прэм'ер-міністр Украіны Арсеній Яцанюк у ЗША вельмі апраўдана папрасіў даць стралковую зброю і боепрыпасы - проста, як знак сілы і падтрымкі ўкраінцаў з боку ЗША - на жаль, мы гэтага не падалі. Ніхто не скажа, што было б, калі б мы паступілі інакш, але я думаю, што менавіта такая слабасць дала Пуціну сігнал, што ён можа беспакарана працягваць рабіць тое, што хоча", - адзначыў Джонсан.

Палітык таксама адзначыў, што, на яго думку, без лідарства ЗША свет стаў значна больш небяспечным. "Амерыка павінна быць лідарам. Цяпер гэтага не хапае. Мы проста перасталі быць лідарам у свеце. І таму свет стаў значна, значна больш небяспечным", - адзначыў Джонсан.

Таксама, у панядзелак стала вядома, што ў чацвер у сенацкім камітэце па замежных справах адбудуцца слуханні з нагоды дэстабілізацыі Украіны Расеяй. "Уладзімір Пуцін з'яўляецца рухаючай сілай дэстабілізацыі Украіны. Важна, каб народ Амерыкі зразумеў уплыў расейскай агрэсіі на інтарэсы ЗША. Гэтыя слуханні дадуць членам Камітэта задаць пытанні вядучым чыноўнікам Дзяржаўнага дэпартамента і міністэрства фінансаў з нагоды дзеянняў Расеі і стратэгіі адміністрацыі накіраванай на супрацьдзеянне ім", - гаворыцца ў паведамленні на сайце сенацкага камітэта.