Прыватнікам забароняць імпарт тавараў у Беларусь

Увоз імпартных тавараў, аналагі якіх вырабляюць у краіне, дазволяць толькі спецімпарцёрам.

Адпаведны праект дзяржаўнай пастановы распрацаваны ўладамі Беларусі. Паводле яго, з 1 ліпеня ў краіне плануецца ўстанавіць выключнае права дзяржавы на ўвоз тавараў, аналагі якіх вырабляюцца на тэрыторыі краіны, піша «Інтэрфакс».

«Праект такога дакумента існуе, ён распрацоўваўся Саветам міністраў і міністэрствам прамысловасці», - сказаў старшыня праўлення Беларускай аўтамабільнай асацыяцыі Сяргей Міхневіч.

Як адзначаецца ў праекце дзяржаўнай пастановы, распрацоўшчыкі дакумента маюць намер даць тэрмінам на паўгода статус спецімпарцёра 12 прамысловым прадпрыемствам, у тым ліку адкрытым акцыянерным таварыствам «МАЗ», «МТЗ», «Белшына», «Гарызонт», «Атлант», «Гомсельмаш» і некаторым іншым.

Так, МАЗу будзе дадзена выключнае права ўвозу ў Беларусі ўсіх аўтамабіляў, у тым ліку легкавых, як з краін далёкага замежжа, так і з Расеі, і Казахстана.

Аналагічна, МТЗ будзе выступаць спецімпарцёрам сельгастэхнікі і абсталявання, «Гомсельмаш» - камбайнаў, «Гарызонт» - бытавой тэхнікі, радыё-, тэле-і відэаапаратуры, «Атлант» - халадзільнікаў і пральных машын.

У сувязі з гэтым Сяргей Міхневіч адзначыў неадназначнасць прапанаваных дзяржаўнымі органамі мер абароны ўнутранага рынку і ўласнага вытворцы.

«Цяпер асацыяцыя вядзе досыць прадуктыўны дыялог з распрацоўшчыкамі - Саўмінам і Мінпрамам, спрабуючы ўдасканаліць гэты дакумент, каб не нанесці шкоды астатнім імпарцёрам і эканоміцы ў цэлым», - сказаў ён.

Са свайго боку ў Мінпраме растлумачылі, што праект дакумента накіраваны на падтрымку беларускіх вытворцаў прамысловых тавараў, а таксама на скарачэнне спажывецкага імпарту.

Адказваючы на пытанне агенцтва пра тое, ці не нанясуць такія меры шкоду беларускім кампаніям - буйным рытэйлерам бытавой тэхнікі і электронікі, у Мінпраме заўважылі, што «гэта падстава для іх павярнуцца тварам да тавараў беларускіх вытворцаў, якія ў якасці ніякім чынам не саступаюць сёння імпартным аналагам».

Фота: brestcity.com