Беларусам пакінуць 10 гатункаў імпартнага піва

Колькасць замежнага піва ў Беларусі рэзка скароціцца.

Імпартны хмельны напой вырашылі прыбраць з прылаўкаў на час ЧС па хакеі. Але акрамя гэтага, з 1 траўня імпартнае піва можна прывезці ў краіну толькі пасля атрымання ліцэнзіі. Што ж адбываецца з півам зараз? Абышоўшы некалькі буйных крам, убачыла ўсяго пару-тройку паліц з імпартным пенным напоем. Выбару амаль няма. Каб знайсці нейкі пэўны гатунак, прыйдзецца аб'ехаць некалькі крам, піша «Комсомольская правда в Беларуси».

- На складах ужо нічога не засталося. Усё, што вы бачыце на прылаўках, - рэшткі, - дзеліцца прадстаўнік аднаго з буйных беларускіх імпарцёраў піва.

- Мы ўжо атрымалі пяць ліцэнзій, - распавялі ў адной з фірмаў-імпарцёраў піва. - Гэта значыць, што ўжо пяць гатункаў піва можам увозіць на тэрыторыю Беларусі для продажу. Дакументы на астатнія гатункі цяпер у працэсе падрыхтоўкі, узгадняюцца. Спадзяемся, што нам удасца адстаяць увесь асартымент.

У іншай кампаніі-імпарцёры, якая спецыялізуецца на ўвозе ўкраінскага піва, настроі не такія аптымістычныя.

- Цяпер усе вытворцы ўкраінскага піва дамаўляюцца з Белдзяржхарчпрамам, але пакуль ім гэтага зрабіць не ўдалося. Украінскае піва будзе, проста трэба пачакаць, - кажуць там.

На мінулым тыдні ў Мінгандлі казалі, што ліцэнзій атрымана дзевяць штук, імпарцёры кажуць, што зараз гаворка можа ісці прыкладна пра дзесяць дазволаў.

Дарэчы, нядаўна з'явілася чутка, што чыноўнікі і зусім хочуць пакінуць на прылаўках крам не больш за 10% імпартнага піва. Маўляў, падчас ЧС усе куплялі беларускае - і нічога не здарылася. Аднак афіцыйнага пацверджання гэтага новаўвядзення пакуль няма.