29 сакавiка 2024, Пятніца, 9:02
Падтрымайце
сайт
Сім сім,
Хартыя 97!
Рубрыкі

60% віцебскіх прадпрымальнікаў не выйшлі на працу

17
60% віцебскіх прадпрымальнікаў не выйшлі на працу

Улады адмаўляюцца ісці на саступкі прадпрымальнікам.

На віцебскіх рынках спадзяюцца, што іх праблемы можна развязаць, але толькі на самым высокім узроўні. Напрыклад, скасаваць або ўнесці папраўкі ва ўказ №222, які забараняе гандаль без сертыфікатаў і суправаджальных дакументаў на тавары, у тым ліку тыя, якія ўвозяцца з краін Мытнага саюза. Прадпрымальнікі сцвярджаюць, што патрабаванні ўказа выканаць немагчыма, перадае «Радыё Свабода».

Аб сваім намеры спыніць працу з 1 ліпеня віцебскія прадпрымальнікі заяўлялі яшчэ тры тыдні таму. За гэты час прадстаўнікі аддзела гандлю і іншых структур наведалі некалькі рынкаў, але задобрыць прадпрымальнікаў у іх не атрымалася.

Не атрымалася нешта вызначыць і 30 чэрвеня: непасрэдна перад 1 ліпеня ў аблвыканкам запрасілі старшыняў віцебскіх кірмашоў. Але канструктыўнай размовы не атрымалася і на гэтай сустрэчы.

Пра гэта кажа Ірына Яскевіч, прадстаўніца гандлёвага цэнтра «Эвіком», каардынатарка аргкамітэта для стварэння прафсаюза прадпрымальнікаў «Разам»:

«Ініцыятарам сустрэчы быў аддзел падтрымкі і развіцця прадпрымальніцтва, былі мытнікі, супрацоўнікі падатковай, аддзела стандартызацыі... І ні на адну праблему не стала менш. Нас выслухалі, мы распавялі пра свае праблемы, але ў іх ёсць інструкцыі, і яны будуць іх выконваць, бо нічога нельга памяняць на нашым абласным узроўні. Мы неаднаразова і раней казалі пра свае цяжкасці, чыноўнікі пра іх ведалі, але чаму не абмяркоўвалі гэта на вышэйшым узроўні, незразумела. Таму мы кажам, што ў такіх умовах працаваць не можам».

Са слоў Ірыны Яскевіч, амаль 60% віцебскіх прадпрымальнікаў ужо падалі ў падатковую інспекцыю «нулявыя» дэкларацыі - дакумент, які сведчыць аб тым, што праца спыненая. Але такая дэкларацыя дазваляе аднавіць гандаль у кожны момант.

Самая вострая праблема, якая падштурхнула да гэтага - немагчымасць рэалізоўваць рэшткі тавару, набытага да тых часоў, як пачаў дзейнічаць указ аб абавязковай сертыфікацыі. Гандляваць рэшткамі было афіцыйна дазволена менавіта да 1 ліпеня. Але напярэдадні Ірына Яскевіч атрымала афіцыйны ліст аб тым, што тэрмін гэты падоўжаны да сакавіка наступнага года.

На іншыя пытанні, зададзеныя ў лісце да Лукашэнкі, віцебскія прадпрымальнікі адказу не маюць. Паводле закону, на звароты грамадзян трэба адказваць на працягу 30 дзён. На адпраўлены 6 чэрвеня ліст варта чакаць адказу не пазней за 10 ліпеня, падлічыла Ірына Яскевіч:

«У нашым звароце былі тры пытанні. Акрамя пытання аб астатках тавару былі яшчэ пытанні аб прызнанні сертыфікатаў дзяржаў Мытнага саюза, аб мытах, якія мы павінны плаціць... Увогуле, калі ўзяць калькулятар і падлічыць падаткі, то нават калі знойдзеш дакументы, якія знайсці ў прынцыпе не магчыма, ты проста не зможаш усё аплаціць».

Афіцыйнага адказу на гэтыя пытанні і хочуць дачакацца віцебскія прадпрымальнікі. Хоць ёсць і іншыя праблемы: да прыкладу, каб прывезці тавар, прадпрымальнік павінен цяпер замаўляць спецыяльны транспарт. Прывозіць на продаж рэчы з паездак, арганізаваных турыстычнымі фірмамі, цяпер нельга.

Прадпрымальнікаў чакаюць яшчэ вялікія выдаткі, большасць з іх гэта разумее, і таму на закрытых ралетах з 1 ліпеня з'явяцца аб'явы аб закрыцці з розных прычын, прадаўжае Ірына Яскевіч:

«Напэўна, ніхто не адважыцца напісаць наўпрост, што зачыніўся, таму што так працаваць не можа. Але мы вымушаны чакаць адказу на наш ліст, і пра гэта мы сказалі чыноўнікам. Сказалі, што гэта SOS, трывога, што мы дайшлі да граніцы! Бо працаваць на адных астатках, калі няма памераў, няма выбару колеру, няма нічога новага, а наперадзе восень, і дзетак трэба будзе збіраць у школу - так працаваць мы проста не зможам».

Напісаць каментар 17

Таксама сачыце за акаўнтамі Charter97.org у сацыяльных сетках