На Гарадзеншчыне пераследуюць незалежных журналістаў
1- 24.07.2014, 15:16
- 5,476
Журналіст-фрылансер Андрэй Мялешка не здолеў абскардзіць пастанову Кастрычніцкага суда Гародні.
Раней журналіст Андрэй Мялешка быў аштрафаваны на 4,5 млн рублёў за супрацоўніцтва з замежнымі СМІ без акрэдытацыі, перадае «Радыё Свабода».
Мялешка мяркуе, што ў судзе не была даведзеная ягоная віна, бо рапарт, які быў на яго складзены, нават не правяраўся, і гэта прызнаў у судзе сведка-міліцыянт. Паводле рапарту, на сайце «Радыё Рацыя», якое транслюецца з Польшчы, быў змешчаны матэрыял пад псеўданімам Ігар Нікалаеў. Раней Мялешка карыстаўся такім псеўданімам, за што пракуратура вобласці выносіла яму папярэджанне.
Але ў судзе Мялешка намагаў на тым, што ён не ведае, як яго матэрыял трапіў на сайт.
«Сёння суддзя спытаў мяне, ці ведаю я закон аб СМІ, і параіў яго пачытаць. Але хай бы ён звярнуў увагу на тое, што ў судзе над законамі і рознымі інструкцыямі вяршэнства мае Канстытуцыя Беларусі. І пра гэта нашы суддзі забываюць. Я думаю, што пераслед журналістаў-фрылансераў на мне не спыніцца», - паведаміў журналіст.
На Гарадзеншчыне гэта ўжо трэці за апошнія месяцы суд над журналістам-фрылансерам. У пачатку красавіка на 30 базавых адзінак (чатыры з паловай мільёны) быў аштрафаваны сябра ГА «БАЖ» Алесь Дзянісаў - «за незаконны выраб і распаўсюд прадукцыі СМІ», гэта значыць, за супрацоўніцтва з тэлеканалам «Белсат».
Па тым жа артыкуле за супрацоўніцтва з тэлеканалам «Белсат» Карэліцкі раённы суд у траўні аштрафаваў на 30 базавых адзінак сябра БАЖ Алеся Залеўскага.