The Times: Патрэбныя санкцыі супраць энэргетычнага і абароннага сектараў Расеі

Заходнія санкцыі павінны стаць элементам стратэгіі, якая вымусіць Пуціна вызначыцца з курсам краіны.

Урад Украіны сцвярджае, што ўчора сепаратысты збілі два ўкраінскія знішчальнікі. Заходняя прэса разважае, як уздзейнічаць на паводзіны Расеі. The Guardianі The Timesпрапануюць свае варыянты санкцый, Independentдае парады лідарам еўрапейскіх краін, The Wall Street Journalдае ацэнку дзеянням Абамы.

«Погляд The Guardian на санкцыі супраць Расеі» - так называецца артыкул The Guardian. Рэакцыя на ўдар па малайзійскаму лайнеруспараджаецца абурэннем і смуткам, адзначае выданне. «Але варта падкрэсліць, што тое, што здарылася, не было вынікам мэтанакіраваных дзеянняў, і было б па-дурному дапусціць, каб помста ці жаданне ўбачыць кагосьці на лаве падсудных прадвызначала палітыку», - гаворыцца ў артыкуле.

На самой справе праблема не ў тым, што быў збіты грамадзянскі лайнер, а ў тым, як пакласці канец вайне ва Усходняй Украіне. Пры разглядзе пытання аб санкцыях ЕЗ і ЗША «варта зрабіць усё, што, верагодна, падштурхне Пуціна згарнуць расейскае ваеннае ўмяшанне І, наадварот, варта пазбягаць усяго, што памяншае верагоднасць гэтага кроку», - рэкамендуе газета.

Доўгатэрміновыя эканамічныя перспектывы ў Пуціна не вельмі добрыя, Расея таксама губляе пазіцыі як пастаўшчык энэрганосьбітаў. «Чаму б не прыціснуць Пуціна да сцяны яшчэ мацней?» - спытаюць ястрабы. Газета пярэчыць: «Калі ўлічыць яго характар ​​і яго меркаванне, што зламысны Захад спрабуе аслабіць і ізаляваць Расею, то вынікам цалкам можа стаць не сыход, а экспансія ваеннага ўмяшання ва Украіне». Трэба адкалібраваць санкцыі так, каб Пуцін перадумаў, мяркуе выданне.

Санкцыі таксама павінны суправаджацца крокамі, здольнымі прывесці да ўрэгулявання, якое можа задаволіць Пуціна ці, як мінімум, даць яму падставу для змены падыходу. Будучыня расейскамоўных грамадзян Украіны, якія не прывіталі рэвалюцыю Майдану і варожа ставяцца да Кіева, - праблема непадробная, мяркуе газета. Дзеля міру ва Украіне яе трэба развязваць.

Вось меркаванні, якімі трэба кіравацца пры абмеркаванні санкцый, падсумоўвае выданне. Галоўнае - не пакараць Расею, а дамагчыся пераменаў.

«Націснуць на Пуціна» - так называецца артыкул у The Times. Газета раіць зрабіць больш жорсткімі санкцыі «як элемент стратэгіі, якая вымусіць Пуціна заявіць публічна, якім шляхам ён хоча весці Расею - да ізаляцыі або да супрацоўніцтва з Захадам».

Наступная фаза санкцый павінна закрануць банкаўскі, энэргетычны і абаронны сектар Расеі. «Гэтыя санкцыі варта ўвесці, калі Пуцін ў абумоўлены тэрмін не дэмілітарызуе і не раззброіць групоўкі паўстанцаў, не перакрые расейска-ўкраінскую мяжу і не акажа садзейнічанне ў пошуках і прыцягненні да судовай адказнасці тых, хто збіў борт MH17», - гаворыцца ў артыкуле.

Калі Пуцін прыхільнік ідэі Расеі як сучаснай краіны, якая ідзе ў нагу са светам, то вышэйзгаданыя саступкі - мінімальныя, мяркуе газета.

Складанасць у тым, што немагчыма загадзя прадбачыць, як санкцыі паўплываюць на паводзіны Пуціна. «Калі ён уважае перманентную анэксію Крыму за пытанне нацыянальнай бяспекі, то меры, якія пагражаюць агалоскай яго асабістага багацця, наўрад ці падзейнічаюць», - піша газета.

Выданне заклікае да паслядоўных і тонка прадуманых санкцый. Галоўная складанасць - давесці Крамлю, што ён дзейнічае ва ўласных інтарэсах, а не пад ціскам.

«Маскоўскае бізнэс-лобі асцерагаецца, што ўкраінская авантура прымусіць Пуціна не адкрыць Расею свету, а замкнуцца на сваёй краіне. Мудрыя санкцыі могуць дапамагчы гэтым людзям пераканаць цвердалобых, якія мараць пра новыя спосабы выдаткаваць расейскі абаронны бюджэт», - так завяршаецца артыкул.

«Пуцін высветліў, чаго варты Абама» - такі загаловак у The Wall Street Journal. Калі вы думалі, што ўдар расейскімі ракетамі па грамадзянскаму самалёту зменіць усё ці нават хоць нешта, то вы пралічыліся, піша газета. «У панядзелак прэзідэнт Абама пагразіў пальцам, у аўторак ЕЗ не ўвёў новыя санкцыі, а ў сераду паўстанцы, якіх узбройвае Расея, збілі яшчэ два ўкраінскія знішчальнікі», - гаворыцца ў артыкуле.

На гэтым тыдні супрацоўнікі выведкі ЗША заявілі журналістам, што пасля катастрофы малайзійскага лайнера Расея працягвала пасылаць паўстанцам ракеты, танкі і іншыя складаныя ўзбраенні.

Але сусветныя СМІ хапаюцца за кожны намёк на прымірэнне з вуснаў прэзідэнта Пуціна. На думку газеты, пакуль Пуцін «рэагуе з прадказальнай пагардай»: ён публічна «абвінаваціў Украіну ў тым, што MH17 быў збіты, а таксама адхіліў патрабаванні Захаду садзейнічаць расследаванню і спыніць забеспячэнне вайны ва Усходняй Украіне».

«Пуцін высветліў, чаго варты Абама: ён бачыць перад сабой прэзідэнта, які нават не кажа выразна пра віну Расеі ў катастрофе пасажырскага самалёта. Навошта Пуціну наогул звяртаць увагу на словы Абамы?» - заключае выданне.

«Борт MH17 Malaysia Airlines: Вялікая Брытанія і Францыя павінны накіраваць свой ​​гнеў на Уладзіміра Пуціна», - рэкамендуе ў загалоўку Independent.

Абмежаваныя санкцыі - толькі спосаб выказаць калектыўныя эмоцыі, а эфектыўныя санкцыі супраць Расеі занадта моцна ўдараць па эканоміцы ЕЗ. Якімі б вузкімі ні апынуліся санкцыі, якія задаволяць усіх чальцоў ЕЗ], вельмі важна, каб Захад заставаўся аднадушным, раіць газета. У гэтым кантэксце прэм'ер-міністр Кэмеран дарэмна заявіў: «у будучыні не павінен праводзіцца продаж вайсковай прадукцыі з кожнай краіны Еўропы» ў Расею. Французы справядліва, як мяркуе газета, назвалі Кэмерана крывадушнікам. У Вялікай Брытаніі ёсць сотні ліцэнзій на экспарт зброі ў Расію, а лонданскі Сіці моцна нажываецца на сувязях з расейскімі алігархамі.

«Галоўнае – салідарнасць», - паўтарае газета. На яе думку, «міжнародная кааліцыя ахвяр на чале з Малайзіяй і Галандыяй» [г.зн. краінамі, чые грамадзяне загінулі ў катастрофе] аказала выцверажальны эфект на «данецкіх сепаратыстаў і іх маскоўскіх заступнікаў». «Вось узор для пераймання. А Кэмерану не варта дэманстраваць амбіцыі», - так завяршаецца артыкул.

Фота: Getty Images