Бакіева завочна прысудзілі да пажыццёвага зняволення

Беглы прэзідэнт Кыргызстана прызнаны вінаватым у арганізацыі масавага забойства 7 красавіка 2010.

Былы прэзідэнт Кыргызстана, уцякач з краіны, Курманбек Бакіеў і ягоны малодшы брат, экс-начальнік Службы дзяржаховы Жаныбек Бакіеў прызнаныя вінаватымі ў суўдзеле ў арганізацыі масавага забойства 7 красавіка 2010 года і завочна прысуджаныя да пажыццёвага зняволення з канфіскацыяй маёмасці, піша «Інтэрфакс».

Прысуд абвясціў у пятніцу ў Бішкеку старшыня суддзя Дамір Аналбекаў.

Ён сказаў, што абодва браты Бакіевых таксама прызнаныя вінаватымі ў замаху на забойства і перавышэнні службовых паўнамоцтваў. Суд пазбавіў іх права займаць дзяржаўныя пасады цягам трох гадоў.

Акрамя Бакіевых, прызнаныя вінаватымі і асуджаныя на 25 гадоў пазбаўлення волі былыя намеснікі начальніка СДА Даніяр Дунганаў і Нурлан Тэмірбаеў.

Акрамя таго, Темірбаеву ставяць у віну перавышэнне паўнамоцтваў пры дачы загаду ўжываць зброю ў дачыненні да мітынгоўцаў. Такое ж абвінавачанне выстаўлена былому кіраўніку спецслужбы Мурату Суталінаву, які, як і кіраўнікі службы дзяржаховы, прызнаны вінаватым у суўдзеле ў забойстве і арганізацыі замаху на забойства. Ён прысуджаны да 20 гадоў пазбаўлення волі. Усе яны прысутнічалі на абвяшчэнні прысуду.

7 красавіка ў цэнтры Бішкека адбыліся сутыкненні паміж уладай і апазіцыяй, падчас якіх больш за 80 чалавек былі забітыя, больш за 300 пацярпелі. У выніку гэтых падзей у Кыргызстане змянілася ўлада, а былы прэзідэнт збег з краіны.

Суд паводле падзей 7 красавіка 2010 доўжыўся чатыры гады, на лаве абвінавачаных былі 28 чалавек, сярод якіх былыя высокапастаўленыя чыноўнікі адміністрацыі Бакіева і чальцы ўрада.

Абвяшчэнне прысуду адбывалася пры падвышаных мерах бяспекі, усіх асуджаных выводзілі з залы па адным у шчыльным коле аховы, каб пазбегнуць усялякіх агрэсіўных дзеянняў у дачыненні да іх з боку сваякоў загінулых і пацярпелых.

Нагадаем, экс-прэзідэнт Кыргызстана Курманбек Бакіеў пасля рэвалюцыі збег з краіны і пасяліўся ў Беларусі. У мінулым годзе ў СМІ з'явілася інфармацыя аб тым, што ў Менску знаходзіцца і Жаныбек Бакіеў, які ў перыяд кіравання краінай братам узначальваў Службу дзяржаўнай аховы. У пачатку 2013 года былы прэзідэнт і яго брат Жаныш былі завочна асуджаныя паводле справе аб гібелі былога кіраўніка прэзідэнцкай адміністрацыі Медэт Садыркулова, які, як сцвярджалася, быў забіты ранейшай уладай за тое, што збіраўся перайсці ў апазіцыю. Паводле гэтай справу Курманбек Бакіеў завочна атрымаў 24 гады турмы, ягоны брат - завочны пажыццёвы тэрмін. Бішкек афіцыйна запатрабаваў выдачы Бакіевых, але атрымаў адмову.