Амбасадар ЗША ва Украіне: Крэмль трэба ацверазіць

(абноўлена - 15:55) Вашынгтон гатовы ўвесці дадатковыя санкцыі ў дачыненні да Масквы.

Амбасадар ЗША ва Украіне Джэфры Пает падкрэсліў, што пастанова аб гэтым будзе прынятая, калі не адбудзецца дээскалацыі сітуацыі ў Данбасе. Пры гэтым мэта гэтых санкцыяў - не знішчыць расейскую эканоміку, а «ацверазіць Крэмль». Пра гэта амбасадар заявіў на брыфінгу ў Кіеве, піша ЛІГАБізнесІнформ.

«Мэта гэтага мерапрыемства - гэта не санкцыі дзеля санкцый. Яны не накіраваныя на тое, каб усякім коштам знішчыць расейскую эканоміку, яны накіраваны на тое, каб ацверазіць Крэмль, прымусіць дыпламатычныя крокі рабіць, каб Крэмль зрабіў стратэгічны выбар, каб узялі курс на збліжэнне з урадам і Парашэнкі, і з украінскім народам», - адзначыў амерыканскі амбасадар.

З ягоных слоў, расейская эскалацыя, несумненна, узрасла за мінулы тыдзень.

«Гэта ўключае і агонь праз мяжу, і дадатковыя пастаўкі цяжкай артылерыі, установак «Град», і ўзбраенняў, і дадатковых вайсковых утварэнняў, груповак праз мяжу. Мы гатовыя, калі гэтая эскалацыя будзе працягвацца, павялічыць для Крамля кошт за ўсё гэта. І мы сур'ёзна думаем над тым, каб не быць партнёрамі», - сказаў ён. Каментуючы катастрофу «Боінга-777» у небе над Данбасам, Пает адзначыў, што Злучаным Штатам карціна агулам зразумелая.

«Гэта не таямніца і не сакрэт. Мы ведаем, што самалёт быў збіты ракетай зямля-паветра, якая была запушчаная з тэрыторыі, занятай тэрарыстамі. Мы ведаем, што ёй кіравалі тыя, хто прыйшоў з расейскай тэрыторыі. Мы ведаем, што Расейская Федэрацыя пастаўляе шмат рознага ўзбраення і тэхнікі на тэрыторыю Украіны», - адзначыў ён.

Пает дадаў, што ЗША праводзяць разведачныя работы і збор выведдадзеных.

«Тут працуюць адмысловыя сілы Расеі. Я думаю, ёсць сэнс успомніць шматлікія перахопы тэлефонных размоў. Мы самі праводзілі расшыфроўку і транскрыпцыю гэтых перахопаў...Што цікава, расейскія грамадзяне, якія як бы ўзначальваюць так званыя народныя рэспублікі, - яны ўвесь час былі ў кантакце з грамадзянамі і ўладамі Расейскай Федэрацыі. Карціна дастаткова зразумелая...Калі гаворка ідзе пра разведвальную інфармацыі, мы не можам шырока пра яе гаварыць. Але я думаю, у каго расплюшчаныя вочы - могуць зразумець і ўбачыць самі», - сказаў ён.

Пайет нагадаў, што за апошнія тыдні ў кіраўніцтве самаабвешчанай ДНР адбыліся значныя змены, і складваецца ўражанне, што «ўсё больш і больш у гэтым заўважны ўдзел Расеі». «Што зразумела? Што Пуцін адным званком мог бы спыніць гэта, сказаць кіраўніцтву, што спыніце ўсякія тэрарыстычныя акцыі», - падсумаваў ён.

Нагадаем, раней прадстаўніца Дзярждэпартамента Мары Харф заявіла, што ў ЗША ёсць звесткі аб тым, што Расея мае намер перадаць магутныя ракетныя сістэмы прарасейскім паўстанцам ва Украіне, але адмовілася паведаміць падрабязнасці аб гэтых сістэмах ці пра тое, якім чынам быў зроблены такі вывад.