АГП просіць ЕЗ увесці санкцыі супраць магілёўскіх ідэолагаў

Спіс з трох магілёўскіх ідэолагаў перададзены ў еўрапейскія структуры для прыняцця пастановы аб візавых санкцыях.

Пра гэта паведаміў старшыня абласной арганізацыі Аб'яднанай грамадзянскай партыі Уладзімір Шанцаў, піша ucpb.org.

«На 27 ліпеня ў Магілёўскай вобласці актывістамі АГП было запланавана правядзенне 24 пікетаў. Мы збіраліся гэтым не толькі падкрэсліць, што Дзень Незалежнасці ў краіне ўсё ж такі 27 ліпеня, у дзень абвяшчэння Дэкларацыі аб суверэнітэце Беларусі. Мы збіраліся ў гэты дзень таксама выказаць салідарнасць з украінскім народам, які змагаецца за сваю незалежнасць, за суверэнітэт», - піша ён.

На ўсе заяўкі былі атрыманыя адмовы.

«У мінулым ніводная заяўка ад чальцоў нашай партыі на правядзенне масавых мерапрыемстваў у вобласці не была задаволеная. Ні ў якім пункце немагчыма правесці масавае мерапрыемства. У нас забаронена абірацца, бо дзейнічае сістэма прызначэння, у нас забароненыя мітынгі, сходы, вулічныя шэсці. І за ўсім гэтым праглядаецца праца ідэалагічных работнікаў, якія адмаўляюць нам у тым, што гарантавана Канстытуцыяй.

І пра што ўжо неаднаразова гаварылася, у адпаведнасці з арт.4 Канстытуцыі ў нас не можа быць дзяржаўнай ідэалогіі, а значыць, не павінна быць ідэалагічных аддзелаў на прадпрыемствах і ў арганізацыях. Але калі за занятак незаконнай дзейнасцю звычайныя грамадзяне караюцца рублём бязлітасна, то ідэалагічныя работнікі за гэта атрымліваюць немалыя грошы. Дзяржава вядзе з насельніцтвам несумленную гульню», - адзначае Уладзімір Шанцаў.

Актывісты наважылі не звяртацца па падтрымку ў суды, бо яны ў такіх выпадках стаяць на старане ўладаў.

«Мы прынялі пастанову адправіць спіс у еўрапейскія структуры для прыняцця пастановы аб візавых санкцыях. Першыя прозвішчы ўжо там, і спадзяемся, тры магілёўскія ідэолагі хутка атрымаюць свае заслужаныя «лісты шчасця», - паведаміў ён.