ЗША эвакуявалі амбасаду ў Лівіі
2- 26.07.2014, 17:40
- 3,905
ЗША часова закрылі амбасаду ў Лівіі і эвакуявалі персанал праз баі, якія пачаліся паблізу.
Пра гэта паведамляе Reuters са спасылкай на заяву Дзярждэпу. Першапачаткова паведамлялася, што эвакуацыя была праведзеная па паветры, затым у Дзярждэпе ўдакладнілі, што знішчальнікі F-16 і канвертаплан Osprey толькі праводзілі прыкрыццё аўтамабільнай калоны.
Персанал амбасады пакінуў Трыпалі ў суботу, перабраўшыся ў суседні Туніс, гаворыцца ў заяве. Праца прадстаўніцтва адновіцца, калі палепшыцца сітуацыі з бяспекай, паведамляе РІА «Новости». Колькі чалавек былі эвакуяваныя, не ўдакладняецца. АР нагадвае, што амбасада даўно функцыянавала з мінімальнай штатнай колькасцю работнікаў.
У сталіцы Лівіі Трыпалі ўжо тыдні працягваюцца жорсткія сутыкненні паміж рознымі групоўкамі баевікоў. Сутыкненні за сталічны міжнародны аэрапорт працягваюцца з 13 ліпеня. У выніку баёў пацярпела вялікая частка паветраных судоў. Значная шкода прычыненая будынку кантрольна-дыспетчарскага пункта, пад'язным шляхам і іншым прылеглым да аэрапорта аб'ектам. Загінулі больш за 50 чалавек.
Абстаноўка ў Лівіі змушае міжнародныя арганізацыі і дыппрадстаўніцтвы, якія дзейнічаюць там, часова прыпыніць сваю працу і эвакуяваць персанал, нагадвае ІТАР-ТАСС. У пятніцу 25 ліпеня МЗС Турцыі прыняла пастанову аб эвакуацыі сваёй амбасады ў Трыпалі на туніскую выспу Джэрба. Раней у сярэдзіне ліпеня ААН таксама эвакуявала сваю місію з Лівіі.
У верасні 2012 года ў Бенгазі пры нападзе на амерыканскае консульства былі забітыя амбасадар ЗША ў Лівіі Крыстафер Стывенс і трое супрацоўнікаў амбасады.
ЗША падтрымалі ў 2011 годзе звяржэнне шматгадовага лідара лівійскай рэвалюцыі Муамара Кадафі. Цяпер на тэрыторыі краіны дзейнічае вялікая колькасць узброеных фарміраванняў, арганізаваных паводле тэрытарыяльнага або племяннога прынцыпу. У некаторых раёнах Лівіі абсталяванне і баявыя магчымасці такіх атрадаў значна пераўзыходзяць магчымасці паліцыі.