Жыхары Смілавіч скардзяцца на адсутнасць вады

Праз воданапорную вежу, што павалілася, частка жыхароў Смілавіч на месяц засталіся без вады.

Пра гэта рэдакцыі сайта charter97.org паведаміў чытач. Ён адзначае, што асабліва пакутуе ўскраіна пасёлка ў Менскай вобласці, якая прымыкае да вёскі Жураўковічы. З ягоных слоў, вады ў дамах няма цэлы дзень, толькі з'яўляецца вельмі слабы напор вады ў кранах ноччу.

«Уяўляеце, што адчуваюць жыхары, калі трэба схадзіць у туалет? - абураецца чытач, апісваючы будні жыхароў пасёлка. - А прыгатаваць ежу, памыць посуд, бялізну, выкупаць дзяцей? З кожным днём усё горш і горш. Наступае не стабільнасць, а «стабілізец». Скаргі ў ЖКГ і пассавет - марнаванне часу і нерваў. ЖКГ ведае сваю справу добра: падвышае кошты на неіснуючыя паслугі, грабе бабкі і ў вус не дзьме. Тую ж пазіцыю занялі і прызначэнцы-«вертыкальшчыкі» мясцовага і раённага ўзроўню.

Публічна звяртаемся яшчэ раз да старшыні Чэрвеньскага раённага выканаўчага камітэта Івана Мухі і старшыні Смілавіцкага пасялковага савета Марціновіч Ірыны. Грамадзяне, займіцеся, нарэшце сваімі непасрэднымі абавязкамі, хопіць раз'язджаць на сваіх «лімузінах» па вёсках ад гультайства! Адпрацуйце сваю не слабую зарплату, якую вам плацяць з нашых падаткаў. Колькі можна здзекавацца над людзьмі! Навядзіце парадак з водазабеспячэннем у гарадскім пасёлку Смілавічы. Не можаце арганізаваць - пакіньце свае пасады, якія вы не апраўдалі, і займіцеся іншай пасільнай працай».

Рэдакцыя сайта charter97.org звярнулася ў пасялковы савет Смілавіч у спробах разабрацца ў сітуацыі.

«Цяпер знікла вада па вуліцы Горкага, але гэта планавае адключэнне, да вечара яна з'явіцца. А тое, што вады няма нібыта месяц - гэта няпраўда. Той раён ужо падключылі да іншай воданапорнай вежы, і вада там ёсць. Магчыма, яна была адключаная на некалькі дзён. Гарачая вада ў іх, праўда, толькі ў ацяпляльны сезон, але халодная ёсць заўсёды! Дарэчы, звычайна да нас адразу прыходзяць скардзіцца, а цяпер скаргаў не паступала», - кажа супрацоўніца пасялковага савета Смілавіч.