Мясніковіч знайшоў «крайніх» у правале прагнозаў

Прэм'ер-міністр абвінаваціў у правале прагнозных паказчыкаў кіраўнікоў прадпрыемстваў.

Міхаіл Мясніковіч заявіў пра гэта перад тым, як заслухаць справаздачы губернатараў, міністраў і кіраўнікоў канцэрнаў пра чаканыя вынікі работы эканомікі Беларусі за студзень-ліпень, паведамляе БелТА.

«Невыкананне тых ці іншых прагнозных паказчыкаў - гэта сур'ёзны недагляд, за які кадры павінны несці адпаведную адказнасць», - адзначыў прэм'ер-міністр Беларусі.

Са слоў Мясніковіча, ужо на выхадзе дэкрэт аб ўзмацненні адказнасці кіраўнікоў. Ён завізіраваны кіраўніком ўрада ў канчатковай рэдакцыі для прадстаўлення Лукашэнку.

«Там вельмі жорсткія меры адказнасці кадраў. Тыя, хто будзе звольнены за невыкананне вытворчай, тэхналагічнай, працоўнай дысцыпліны, цягам як мінімум пяці гадоў не змогуць займаць нават невысокія пасады», - заявіў ён.

Міхаіл Мясніковіч выказаў занепакоенасць з нагоды інэртнасці, абыякавасці, нават безадказнасці шэрагу кіраўнікоў за выкананне мэтавых задач і паказчыкаў: «праца з кадрамі праводзіцца дрэнна, адсюль і дэфіцыт ідэй».