Сябар Пуціна ў дзюдо трапіў пад санкцыі ЕЗ

Еўрапейскі Звяз пашырыў санкцыйны спіс у дачыненні да Расеі.

Паводле публікацыі ў афіцыйным часопісе ЕЗ, абмежаванні ўведзеныя ў дачыненні да васьмі чалавек і трох кампаній - Расейскага нацыянальнага камерцыйнага банка, СПА «Алмаз-Антэй» і авіякампаніі «Дабралёт», піша РБК.

Сярод фізічных асоб у спіс уключаны першы намеснік кіраўніка адміністрацыі прэзідэнта Расеі Аляксей Громаў, прадстаўніца самаабвешчанай Луганскай народнай рэспублікі Аксана Чыгрына, адзін з лідэраў самаабвешчанай Данецкай народнай рэспублікі Барыс Літвінаў, кіраўнік МУС Крыма Сяргей Абісаў расейскія бізнэсоўцы Аркадзь Ратэнбэрг, Канстанцін Малафееў, Юрый Кавальчук і Мікалай Шамалаў.

Аляксей Громаў як першы намеснік кіраўніка прэзідэнцкай адміністрацыі адказвае за інструктаж расейскіх СМІ што да асвятлення сітуацыі на ўсходзе Украіны і далучэння Крыма, адзначаецца ў дакуменце.

Прэс-сакратарку ЛНР Аксану Чыгрынаву абвінавацілі ў заявах, якія падарвалі тэрытарыяльную цэласнасць і суверэнітэт Украіны. У дакуменце ЕЗ адзначана, што «акрамя ўсяго іншага» заявы Чыгрынавай апраўдвалі дзеянні рушэнцаў падчас катастрофы малайзійскага лайнера Boeing-777 у Данецкай вобласці і захоп закладнікаў украінскімі паўстанцамі.

Барыс Літвінаў стаяў ля вытокаў арганізацыі незаконнага «рэфэрэндуму» аб статусе Данбаса і абвяшчэння ДНР, што з'явілася парушэннем тэрытарыяльнай цэласнасці, суверэнітэту і адзінства Украіны.

Аркадзія Ратэнбэрга абвінавацілі ў даўнім знаёмстве з расейскім прэзідэнтам. ЕЗ адзначае, што ён браў удзел у важных дзяржаўных праектах і атрымаў выгадныя кантракты для сочынскай Алімпіяды. Ратэнбэрг з'яўляецца асноўным акцыянерам кампаніі «Гіпратрансмост», якая атрымала права распрацаваць праект будаўніцтва маста ў Крым.

Усіх, хто ўвайшоў у спіс асобаў і арганізацыі, Брусэль уважае за вінаватых ва ўкраінскім крызісе і атрыманні выгады ад далучэння Крыму. Іх актывы на тэрыторыі ЕЗ будуць заблакаваныя.

Агульная колькасць асобаў, у дачыненні да якіх ЕЗ увёў санкцыі, дасягнула 95 чалавек і 23 арганізацыі і кампаніі.

Еўрапейскі Звяз афіцыйна ўзгадніў пакет сектаральных абмежавальных мер у дачыненні да Масквы ўвечары 29 ліпеня. Пра гэта стала вядома з заявы прэзідэнта ЕЗ Гэрмана Ван Рампея і кіраўніка Еўракамісіі Жазэ Мануэля Барозу.

Cанкцыі павінны паслужыць сур'ёзным папярэджаннем і паказаць, што незаконная анэксія чужой тэрыторыі і наўмысная дэстабілізацыя абстаноўкі ў суседняй незалежнай тэрыторыі непрымальная ў Еўропе XXI стагоддзя. Калі ж шматкроць узрослы ўзровень гвалту прывёў да загубы амаль 300 нявінных людзей, якія ляцелі з Нідэрландаў у Малайзію, сітуацыя запатрабавала неадкладнага адказу.

«З самага пачатку ўкраінскага крызісу Еўразвяз заклікаў кіраўніцтва Расеі дамагацца яго мірнага дазволу. На жаль, даводзіцца прызнаць, што нягледзячы на асобныя сігналы з Масквы і перамовы ў Нармандыі сур'ёзнага жадання прытрымлівацца дамоўленасцей прадэманстравана не было. Зброя і баевікі прадаўжаюць пранікаць на Украіну з боку Расеі. Дзяржава падтрымлівае нацыяналістычную прапаганду, якая апраўдвае незаконныя дзеянні сепаратыстаў. Мы бачылі, як чыніліся перашкоды ў доступе да месца катастрофы самалёта, бачылі непаважлівае стаўленне да парэшткаў загінулых», - гаворыцца ў заяве.

«Расейская Федэрацыя і Еўрапейскі Звяз заўсёды былі важнымі партнёрамі. Мы атрымлівалі ўзаемную выгаду ад шчырага і сумленнага дыялогу, ад супрацоўніцтва, што ўзрастала. Але мы не можам прытрымлівацца ранейшай лініі ва ўмовах анэксіі Крыма, падтрымкі Расеяй узброенага мяцяжу на ўсходзе Украіны і працяглага гвалту, ахвярамі якога становяцца цывільныя грамадзяне», - тлумачыць ЕЗ.