Мясніковіч увёў «школьную форму» для чыноўнікаў

Пацешнае фота з пасяджэння ў Саўміне выставіў блогер Віктар Малішэўскі.

«Вы будзеце смяяцца, але, мяркуючы з гэтага фота, ва ўрадзе ўвялі школьную форму», - напісаў ён на сваёй старонцы ў сацыяльнай сетцы «Фэйсбук».

На здымку - нарада прэм'ер-міністра Міхаіла Мясніковіча, на якой былі заслуханыя справаздачы губернатараў, міністраў і кіраўнікоў канцэрнаў пра чаканыя вынікі работы эканомікі Беларусі за студзень-ліпень 2014 года.

Карыстальнікі сацсеткі практыкуюцца ў дасціпнасці, абмяркоўваючы стыль чыноўнікаў. «Салiдарнасць» прыводзіць некалькі каментароў.

- Гэта летняя форма адзення. Спякота ж.

- Я аднойчы бачыла групу чыноўнікаў сярод гледачоў у Купалаўскім. Тая ж карціна была. Тузін мужыкоў з аднолькавымі фігурамі і ў абсалютна аднолькавых шэрых касцюмах. Уражанні параўнальныя са спектаклем.

- Мяркуючы з гэтага фота, ва ўрадзе сядзіць пастарэлы Фрэдзі Кругер. Фрэд, дзе твая пальчатка?

- Спецвопратка ад «Камінтэрну».

- Баюся, ад Corneliani.

- Можа, канфіскат?

- Калі б не маніторы, то можна было б падумаць, што на двары пачатак 80-х.

Адзначым, што на гэтай нарадзе Міхаіл Мясніковіч выказаў занепакоенасць з нагоды інэртнасці, абыякавасці, нават безадказнасці шэрагу кіраўнікоў у выкананне мэтавых задач і паказчыкаў.

«Праца з кадрамі праводзіцца дрэнна, адсюль і дэфіцыт ідэй», - заявіў прэм'ер-міністр.

Адкуль жа ўзяцца ідэям, калі ў трыццаціградусную спякоту беларускія губернатары, міністры і кіраўнікі канцэрнаў змушаныя насіць пінжакі, якія, падобна, сышлі з аднаго канвеера?

Фота: government.by