Турма для Аўтуховіча не скончылася

Пракурор Ваўкавыскага раёна не знайшоў парушэнняў у забароне міліцыі на выезд былога палітвязня на лячэнне ў Менск.

У сувязі з гэтым Мікалай Аўтуховіч падрыхтаваў скаргу на імя пракурора Гарадзенскай вобласці, паведамляе сайт ПЦ «Вясна».

У адказ на скаргу на дзеянні супрацоўнікаў Ваўкавыскага РАУС раённы пракурор Генадзь Благун паведаміў: «... асобе, якая знаходзiцца пад прэвентыўным наглядам, не забаронена змяняць месца жыхарства. Гэтая працэдура праводзіцца ў паведамляльным парадку. Што ж да выезду за межы раёна ў асабістых пытаннях, у тым ліку для лячэння, то на гэта патрэбна згода органаў унутраных спраў. Заканадаўства Рэспублікі Беларусь не ўтрымлівае нормы, якая абавязвае орган унутраных спраў дазваляць такі выезд пры наяўнасці якіх-небудзь падстаў. З гэтага вынікае, што згода на такі выезд з'яўляецца правам, а не абавязкам органа ўнутраных спраў».

У сваёй скарзе Мікалай Аўтуховіч паказваў, што разглядае забарону супрацоўнікаў міліцыі як неабгрунтаваную, якая парушае яго правы, прадугледжаныя як заканадаўствам аб органах унутраных спраў, так і заканадаўствам аб ахове здароўя.

Абскарджваючы адмову пракурора Благуна, ён намагае на тым, што падставай для адмовы ў выездзе за межы горада могуць быць толькі абгрунтаваныя довады аб тым, што выезд праводзіцца ў супрацьпраўных мэтах або з мэтай зрабіць немагчымым або цяжкім назіранне за яго паводзінамі, папярэджання злачынстваў і патрэбнага прафілактычнага ўздзеяння.

«Для таго, каб даць законную ацэнку дзеянням супрацоўнікаў Ваўкавыскага РАУС варта таксама мець на ўвазе, што непасрэдна пасля названай адмовы мне дазволілі выезд у Менск на часовае пражыванне проста так, без ўказання мэты выезду. Гэта азначае, што сам па сабе мой выезд у Менск не ўяўляў небяспекі для ахоўных законам інтарэсаў дзяржавы і грамадства», - гаворыцца ў скарзе пракурору Гарадзенскай вобласці.

Мікалай Аўтуховіч падкрэслівае пры гэтым, што выснова раённага пракурора аб абгрунтаванасці дзеянняў супрацоўнікаў Ваўкавыскага РАУС зробленая без уліку довадаў, выкладзеных у ягонай скарзе. «Пракурор прыйшоў да памылковай высновы аб тым, што, паколькі дазвол выезду за межы горада з'яўляецца правам органа ўнутраных спраў, то ён можа ім карыстацца на свае меркаванне, адвольна», - піша ён, патрабуючы правядзення праверкі і прыняцця мераў пракурорскага рэагавання.

Нагадаем, пастановай суда Ленінскага раёна Гародні ў дачыненні да Мікалая Аўтуховіча быў усталяваны прэвентыўны нагляд тэрмінам на адзін год і чатыры месяцы і звязаныя з гэтым абмежаванні. Ён можа выязджаць за межы горада, раёна ў службовых і асабістых справах толькі са згоды органа ўнутраных спраў, якія ладзяць прэвентыўны нагляд.

Фота: «Белсат»