Пад Ваўкавыскам пройдзе фестываль феерверкаў
1- 21.08.2014, 9:27
- 6,120
Міжнародны фестываль феерверкаў пройдзе ў Ваўкавыскім раёне 30 жніўня.
Пра гэта паведамілі БелТА ў Ваўкавыскім райвыканкаме.
Мерапрыемства адбудзецца ў маляўнічым месцы на беразе возера ў аграгарадку Вярэйкі ў рамках раённага свята, прысвечанага заканчэнню ўборкі ўраджаю і ўшанаванню ўдзельнікаў жніва. На фестываль запрошаныя вядомыя піратэхнічныя беларускія, расейскія, украінскія і польскія каманды, якія з'яўляюцца прызёрамі міжнародных паказаў. Адбудзецца конкурс феерверкаў. Судзейская калегія з удзелам прадстаўнікоў міжнародных піратэхнічных асацыяцый вызначыць найлепшае піратэхнічнае шоў.
Таксама гледачоў чакае пазаконкурсны гала-феерверк ад беларускай каманды «Кальвін», якая з'яўляецца чэмпіёнам гэтага года Міжнароднага фестывалю феерверкаў у Чэбаксарах (Расея).
Для саміх удзельнікаў фестываль - гэта магчымасць прадэманстраваць апошнія навінкі піратэхнічнага мастацтва, якія абавязкова ўвойдуць у пастаноўкі феерверкаў у сусветных шоў, мяркуюць арганізатары мерапрыемства.
Падчас фестывалю таксама пройдуць паказальныя выступленні творчых калектываў Ваўкавыска ды іншых рэгіёнаў Беларусі. Будуць працаваць гандлёвыя і кірмашовыя павільёны. Аграгарадок цалкам ператворыцца ў пешаходную зону. Уваход на фестываль бясплатны.