Беларус стварыў «плот салідарнасці» з Украінай

Аляксандр Лагада намаляваў на сваім плоце ў вёсцы Салаўі пад Клецкам велізарны жоўта-блакітны сцяг.

Таксама ён зрабіў надпіс «Слава Украіне! Жыве Беларусь!». Плот добра бачны з дарогі, паведамляе «Радыё Свабода».

Людзі на гэта рэагуюць па-рознаму, хтосьці ў знак падтрымкі сігналіць са свайго аўто, некаторыя спыняюцца і паціскаюць руку ў знак павагі за смеласць. Аднак ёсць і такія, хто незадаволена касавурыцца, але, як кажа гаспадар, паколькі гараджане, як сапраўдныя беларусы, досыць выхаваныя і талерантныя, прамой варожасці ў яго бок не было.

«Перыядычна начальства пытаецца, чаму ты не зафарбуеш надпіс. Я адказваю: Ніколі не зафарбую, бо я мяркую, што Украіна заўжды пераможа!», - кажа Аляксандр Лагада.