The New York Times: Расея можа ўварвацца ва Украіну без папярэджання

РФ падвоіла колькасць батальёнаў на ўкраінскай мяжы.

Расія можа адказаць на поспехі сіл кіеўскага ўрада, уварваўшыся на тэрыторыю Украіны пасля мінімальнага часу папярэджання або зусім без абвяшчэння. Пра гэта пішуць карэспандэнты The New York Times (пераклад - Inopressa.ru) Майкл Гордан і Эрык Шміт.

Пры гэтым намеры Крамля па-ранейшаму не зразумелыя: «Мэтай прэзідэнта Уладзіміра Пуціна можа быць ціск на Украіну і ЗША, каб яны пагадзіліся на палітычнае ўрэгуляванне, якое дае ўсходнім украінскім рэгіёнах максімальную аўтаномію. Аднак заходнія афіцыйныя асобы асцерагаюцца, што Пуцін можа таксама рыхтаваць варыянт больш простага ўварвання, на выпадак, калі прарасейскія сепаратысты ва Украіне будуць на мяжы паразы».

На думку крыніц газеты ў амерыканскіх разведвальных колах, расейская інтэрвенцыя можа быць пададзеная як «міратворчая аперацыя». «Гэта цалкам рэальны варыянт, - мяркуе высокапастаўленая крыніца выдання ў міністэрстве абароны ЗША. - І калі Пуцін на яго наважыцца, ён зможа зрабіць гэта амаль або зусім без папярэджання. Мы проста не ведаем, што ў яго на думцы».

Як адзначаюць аўтары артыкула, у супрацьстаянні праз Украіну Крэмль і Захад звяртаюцца да самых звыклых для іх інструментаў. «Для прэзідэнта Абамы і еўрапейскіх лідэраў гэты інструмент - узважаныя эканамічныя санкцыі супраць блізкіх да Крамля банкаў або вузкіх сектараў расейскай эканомікі, накшталт доўгатэрміновай здольнасці Расеі развіваць новыя арктычныя, глыбакаводныя і шэльфавыя нафтавыя радовішчы. Аднак прылада Пуціна - здольнасць і, усё ў большай ступені, гатоўнасць Крамля мабілізаваць грубую вайсковую сілу», - пішуць яны.

«Ён стварыў вайсковыя і палітычныя ўмовы для паспяховага, паводле ягонага ўяўлення, уварвання, - распавёў журналістам адстаўны генерал Уэслі Кларк, былы камандзір Аб'яднанымі сіламі NATO ў Еўропе. - Аднак ён, здаецца, усё яшчэ не прыняў палітычнай пастановы, паколькі разумее, што пасля пачатку ўварвання рызыкі пралічыць немагчыма».

Філіп Карбэр, у мінулым дарадца экс-міністра абароны ЗША Каспара Уайнбэргэра, таксама мяркуе, што дзеянні Расеі могуць прыняць форму «міратворчай аперацыі». Выступаючы перад Кангрэсам ЗША ў ліпені, Карбэр адзначыў, што тэхніка з эмблемай расейскіх міратворчых сіл ужо сканцэнтраваная паблізу ўкраінскай мяжы.

Дзіўным чынам, у Белым доме таксама ўспрынялі ідэю пра ўварванне з мэтай «усталявання міру» сур'ёзна. «Мы назіралі значнае нарошчванне расейскіх сіл уздоўж мяжы, што, магчыма, можа з'яўляцца падрыхтоўкай Расеі для так званай гуманітарнай або міратворчай інтэрвенцыі ва Украіну, - заявіў на мінулым тыдні Энтані Блінкэн, намеснік дарадцы Абамы ў нацбяспецы. - Гэта варта неадкладна спыніць».

Тым часам амерыканскія афіцыйныя асобы і NATO не паведамляюць дакладную колькасць расейскай прымежнай групоўкі, адзначаючы складанасці падліку. На мінулым тыдні супрацоўнікі Пентагона ацэньвалі яе ў 10-13 тысяч чалавек.

Як паведамляў сайт charter97.org, 2 жніўня ў Беларусь з Расеі прыбыў вайсковы эшалон з самаходнымі мінамётнымі ўстаноўкамі. Цягнік з дзесяткамі адзінак вайсковай тэхнікі быў заўважаны жыхарамі горада на чыгунцы.

Фота з архіву