МЗС Чэхіі: Нашая падтрымка дэмакратычных сілаў у Беларусі трывалая
3- 6.08.2014, 16:05
- 5,352
Беларускі праваабаронца Алесь Бяляцкі сустрэўся з міністрам замежных спраў Чэхіі Любамірам Зааралекам.
Міністр замежных спраў Чэхіі Любамір Зааралек 5 жніўня прыняў у Чэрнінскім палацы беларускага праваабаронцу Алеся Бяляцкага - першага лаўрэата прэміі Вацлава Гавела ў правах чалавека, які атрымаў гэтую прэстыжную ўзнагароду падчас зняволення, піша ПЦ "Вясна".
"Я рады, што вы на свабодзе", - цытуе сайт замежнапалітычнай установы Чэскай Рэспублікі міністра Зааралека, які вітаў Алеся Бяляцкага ў Празе, дадаўшы: "Я хацеў бы запэўніць вас, што нашая падтрымка дэмакратычных сілаў у Беларусі трывалая, і мы ставімся да гэтага сур'ёзна. Я зычу вам, каб у вашай краіне было больш свабодных і праеўрапейскі арыентаваных грамадзян".
Алесь Бяляцкі падчас гэтай сустрэчы распавёў, апроч іншага, пра сітуацыю з правамі чалавека, палітычнымі свабодамі ў Беларусі напярэдадні прэзідэнцкіх выбараў, якія адбудуцца ў краіне ў 2015 годзе.