Міліцыянты - Вінярскаму: «Раструшчым табе галаву пасля суда»
58- 1.09.2014, 14:41
- 47,808
(абноўлена) Каардынатара «Еўрапейскай Беларусі» Максіма Вінярскага прысудзілі да 15 дзён арышту.
Суд над каардынатарам грамадзянскай кампаніі «Еўрапейская Беларусь» Максімам Вінярскім прайшоў сёння ў Менску. Першапачаткова яго абвінавачвалі паводле артыкула 17.1 КаАП («дробнае хуліганства»). Аднак высветлілася, што пазней артыкул абвінавачвання ў пратаколе была выпраўлены на 23.4 КаАП ("непадпарадкаванне законным патрабаванням супрацоўнікаў міліцыі»).
На пытанне адваката, чаму ў пратаколе ёсць выпраўленні, сведка-міліцыянт заявіў, што «проста ў мяне ручка, пабітая жыццём».
Судовы працэс вёў суддзя Эдуард Якубоўскі.
Да пачатку працэсу Максім Вінярскі паспеў паведаміць сябрам, што пасля таго, як яго прывезлі ў турму на Акрэсціна 29 жніўня, міліцыянты, якія суправаджалі, яго пагражалі расправай.
На заўвагу актывіста аб тым, што міліцыянты канфіскавалі ў яго кантэйнеры для лінзаў і акуляры, і цяпер ён практычна не бачыць, участковы Люшкевіч В.У. (на фота) заявіў: «раздзяўбем табе галаву пасля суда, будзеш падаць са сходаў і ты, сука, здохнеш».
Пры гэтай сцэне прысутнічаў намеснік начальніка Савецкага РУУС.
Пра гэта сайту charter97.org паведаміла актывістка «Еўрапейскай Беларусі» Юлія Сцяпанава.
У пачатку суда ішло апытанне ўчастковага Люшкевіча В.У. Ён сцвярджаў, што затрымаў Максіма Вінярскага са сваім напарнікам праз тое, што актывіст «падазрона паскорыў крок». Пры гэтым міліцыянт заявіў, што быў адзеты ў форму. Напраўду, са слоў Вінярскага, яго затрымлівалі чатыры чалавекі ў цывільным, сярод якіх не было гэтага ўчастковага.
У выніку актывіст быў асуджаны судом да 15 дзён арышту.
Нагадаем, Максім Вінярскі быў затрыманы 29 жніўня на вуліцы Багдановіча па дарозе ва ўрочышча Курапаты, дзе праходзіла штомесячная талака. Яго даставілі ў РУУС Савецкага раёна і склалі пратакол паводле артыкула 17.1 КаАП.
За некалькі дзён да затрымання Вінярскага выклікалі ў РУУС Фрунзенскага раёна, дзе прапанавалі падпісаць паперу (аб папярэджанні аб недапушчальнасці «экстрэмісцкай дзейнасці»), аднак актывіст адмовіўся гэта зрабіць.
