Вінаваты ў ДТЗ у Менску прыдумаў, як перахітрыць «Белдзяржстрах»

Аднак няхітрая схема не спрацавала.

Прадавец амаль новага аўтамабіля выязджаў з аўтарынка «Малінаўка», а ягоны калега таксама на цалкам маладой машыне заязджаў на тэрыторыю аб'екта гандлю. Аднак ніхто не хацеў саступіць дарогу іншаму - ні паводле правілаў дарожнага руху, ні на простую чалавечую ветлівасць. У выніку Volkswagen Touareg і BMW Х3 сутыкнуліся і нават зачапілі мікрааўтобус Fiat, што стаяў побач, піша БелаПАН.

У кіроўцаў аўтамабіляў не ўзнікла спрэчак, хто вінаваты. Аднак абодва яны збянтэжыліся пытаннем: што рабіць, бо, як гэта часта бывае, машыны з транзітнымі нумарамі апынуліся не застрахаваныя.

І тут вінаватага аварыі наведала думка: неадкладна застрахаваць аўто, затым выклікаць супрацоўнікаў ДАІ на месца ДТЗ. Як пазней было ўстаноўлена, кіроўцы тэрмінова выклікалі грамадзян, на якіх былі зарэгістраваныя машыны. Гаспадары жалезных коней тут жа на рынку аформілі страхоўкі.

Не прайшло і трох гадзін, як бліскучая аперацыя была завершаная - увесь гэта час аўтамабілі стаялі на месцы ДТЗ. І ўжо маючы на руках страхоўкі, кіроўцы выклікалі супрацоўнікаў ДАІ. Пры складанні пратаколаў кіроўцы паказалі час ДТЗ, які не адпавядаў рэчаіснасці.

Затым віноўнік ДТЗ звярнуўся ў «Белдзяржстрах» па страхавыя выплаты. І хоць грошы яму вярнулі, але супрацоўнікаў страхавой кампаніі збянтэжыла тое, што машына трапіла ў ДТЗ праз некалькі хвілін пасля афармлення поліса. І страхавальнікі звярнуліся з заявай у міліцыю.

На дапамогу супрацоўнікам аддзела ў барацьбе з эканамічнымі злачынствамі Менскага РУУС прыйшоў адзін з інтэрнэт-рэсурсаў, на якім былі апублікаваныя фатаграфіі дзіўнага ДТЗ і паказаны рэальны час ягонага ўчынення.

«Мы высветлілі асобу чалавека, які размясціў гэтую інфармацыю, - тлумачыць старэйшы оперупаўнаважаны АБЭЗ Менскага РУУС Валерый Слуцкі. - Затым выявілі некалькі сведак ДТЗ, таксама канфіскавалі запісы з камер відэаназірання, што дазволіла даведацца дакладны час інцыдэнту».

У выніку ў дачыненні да кіроўца, які прыдумаў, як яму здавалася, ідэальную схему атрымання страхавой кампенсацыі, была ўзбуджаная крымінальная справа паводле ч. 3 арт. 209 КК - махлярства, учыненае ў буйной суме.

Гэтая гісторыя цягнецца яшчэ з канца мінулага года, калі, уласна, і здарылася ДТЗ на аўтарынку. Да фіналу ж яно наблізілася толькі цяпер.

Абвінавачаны ў махлярстве грамадзянін віну сваю прызнаў, усю суму шкоды кампенсаваў «Белдзяржстраху». І паколькі раней не быў увязаны ні ў якія крымінальныя гісторыі, то падаў прашэнне аб вызваленні ад крымінальнай адказнасці ў сувязі з дзейным раскаяннем.

Да другога кіроўцу прэтэнзій у страхоўшчыкаў і праваахоўнікаў няма, так як ён хоць і аформіў страхоўку, але за выплатай так і не звярнуўся.