Пенсіянер з Польшчы захапіўся зборам грыбоў і трапіў у Беларусь
17- 19.09.2014, 21:51
- 18,934
Няўдачлівага грыбніка папярэдзілі і перадалі польскім памежнікам.
Грамадзянін Польшчы падчас збору грыбоў не заўважыў, як перайшоў мяжу і апынуўся ў беларускім лесе, паведамілі БелТА ў прэс-службе Берасцейскай памежнай групы.
Парушальніка мяжы на тэрыторыі Камянецкага раёна выявіў памежны нарад. Як высветлілася, 78-гадовы жыхар польскага памежжа так захапіўся «ціхім паляваннем», што страціў у лесе арыентацыю і заблудзіўся.
Пажылы мужчына безвынікова спрабаваў знайсці зваротную дарогу дадому, пакуль не сустрэўся з беларускімі памежнікамі, якія ў гэтым раёне неслі службу.
З польскім пенсіянерам была праведзеная прафілактычная гутарка.
За ненаўмыснае перасячэнне мяжы яго прыцягнулі да адміністрацыйнай адказнасці ў выглядзе папярэджання без дэпартацыі.
Пасля супрацоўнікі Берасцейскай памежнай групы перадалі грыбніка польскім калегам.