«Нам сказалі рыхтавацца да горшага, што наш сын памрэ»
32- 2.09.2014, 10:33
- 27,062
Арцём і Ганна Петрасавы сцвярджаюць, што пасля наведвання паліклінікі ў іх 4-месячнага дзіцяці здарылася заражэнне крыві.
«Салідарнасць» высвятляла падрабязнасці інцыдэнту ў Карэлічах.
- 8 жніўня сыну зрабілі прышчэпку. Яму 4 месяцы. А потым пачалося..., - успамінае падрабязнасці апошніх тыдняў 22-гадовы жыхар невялікага гарадка Арцём Петрасаў.
Гэтыя дні ён і ягоная жонка Ганна не забудуць ніколі.
Са слоў маладога бацькі, на трэці дзень у маленькага Жэні паднялася тэмпература. Спачатку да 37 градусаў, потым да 38-мі. Тэмпература расла, і бацькі адвезлі дзіця ў больніцу.
- Паклалі нас у палату, а дзесьці праз паўтары гадзіны дзіцяці стала зусім дрэнна. Усё цела пайшоў плямамі. Перавялі ў рэанімацыю, - распавядае бацька хлопчыка.
Далей, з ягоных слоў, мясцовыя лекары выклікалі брыгаду з Гародні.
- Сказалі, што самі нямоглыя што-небудзь зрабіць. Прыехалі лекары з вобласці. Высветлілася, што ў сына пнеўмакокавая інфекцыі, заражэнне крыві з паразай унутраных органаў. У Гародню яго браць адмовіліся, баяліся, што не давязуць. І сказалі рыхтавацца да горшага, што шанцаў выжыць у Жэні практычна няма.
Бацькі не адступіліся. З Гародні прыехала новая брыгада лекараў. І таксама неўзабаве з'ехала.
«Молі, каб забралі ў Гародню»
Бацькі дзеляцца: прыехала трэцяя брыгада з абласной больніцы. Практычна ўвесь гэты час у палаце хлопчыка дзяжурыў загадчык рэанімацыйнага аддзялення карэліцкай бальніцы Сяргей Пляскач.
- Ён у той час у адпачынку быў. Прыехаў у больніцу і заставаўся да апошняга моманту, - распавядае Арцём. - Доктар так і сказаў мне: «Прасі, каб забралі ў Гародню, умольвай, на калені станавіся. Тут тваё дзіця не выжыве».
І ён угаварыў. Маленькаму Жэню зрабілі пераліванне крыві і павезлі ў абласную дзіцячую бальніцу.
- Напішу на радыё і ў газету, каб падзякаваць нашаму доктару за дапамогу і парады, - кажа бацька хлопчыка.
Пазней у бальніцы карэспандэнту газеты распавялі, што Сяргей Міхайлавіч Пляскач апошнім часам цяжка хварэў, нядаўна перанёс складаную аперацыю.
«Хачу ведаць праўду»
Бацькі Жэні перакананыя, што іх дзіця атрымала заражэнне ў паліклініцы. Арцём распавядае, што пасля таго, што здарылася пайшоў да медсястры, што рабіла прышчэпку:
- Папрасіў распісаць, што менавіта яна калола нашаму сыну. А яна мне адразу: што, крайніх шукаеш?
З ягоных слоў, яны з жонкай праверыліся ў лекараў, здалі аналізы. Кажуць, што ў іх не знайшлі ніякіх інфекцый.
Маленькі Жэня правёў у рэанімацыйным аддзяленні раённай і абласной больніцы больш за дзесяць дзён, перш, чым пайшоў на папраўку. Са слоў бацькі, хлопчыка выпішуць ў першых чыслах верасня.
Арцём хоча ведаць, што адбылося з ягоным дзіцём.
- У Гародні пацвердзілі дыягназ - пнеўмакокавай інфекцыі. Ці мог ён заразіцца ў шпіталі, не сказалі.
Акрамя Жэні ў Арцёма і Ганны яшчэ двое хлопчыкаў - 3-гадовы Рудзік і 2-гадовы Артур.
«Магчыма, праз парушэнні санітарных нормаў»
Атрымаць каментар у Карэліцкай цэнтральнай раённай больніцы пакуль не атрымалася.
***
Як распавёў выданню адзін з менскіх педыятраў, сама па сабе вакцына не можа выклікаць такіх сур'ёзных наступстваў. Падобнае можа адбыцца ў выніку парушэння санітарных нормаў.
Напрыклад, перад прыёмам здаровага дзіцяці, якому трэба зрабіць прышчэпку, лекар аглядаў інфікаванае або хворае дзіця. Альбо медсястра няякасна апрацавала месца ўколу або ранку.
Фота: Вконтакте. Арцём і Ганна Петросовы.