У Віцебску гаспадар агрэсіўнага ратвейлера адседзеў 15 дзён арышту

Сабака, якога выгульвалі без напысніка, не раз накідваўся на людзей.

Гісторыя гэтая адбылася ў студзені. Аксана, акушэрка адной з радзільні, вярталася з працы. Калі яна праходзіла паўз гімназію №5, насустрач ёй выбег ратвейлер і ўчапіўся ў руку. Тут жа падскочыў другі сабака і ўкусіў Аксану за другую руку. Абодва ратвейлеры былі без павадкоў і без напыснікаў. Падбег незнаёмы мужчына, стаў адцягваць дзяўчыну ад сабак, спрабуючы засланіць яе сабой. Дапамаглі і муж і жонка, якія выйшлі з прыпаркаванага побач аўтамабіля. Праз некаторы час падбеглі двое мужчын і павялі сабак. Гаспадары сабак нават не паспрабавалі папрасіць прабачэння перад дзяўчынай, піша «Комсомольская правда в Беларуси».

Сабакі пакусалі дзяўчыне рукі, падралі світку. Яна звярнулася ў праваахоўныя органы. Калі гісторыю сталі абмяркоўваць у сацыяльных сетках, высветлілася, што агрэсіўных ратвейлераў жыхары мікрараёна ведаюць ужо даўно і аб іх «подзвігах» ходзяць легенды. Дзяўчыне нават даслалі спасылку на старонку гаспадара сабак у адной з сацыяльных сетак. На фота яна пазнала аднаго з мужчын, якія выгульвалі ратвейлераў.

Высветлілася, што Аксана - не адзіная ахвяра ягонага гадаванца! На два гады раней ратвейлер ледзь не загрыз дзесяцігадовую Сашу. Дзяўчынку выратаваў сусед, які чысціў снег каля свайго аўто і рыдлёўкай адагнаў агрэсіўнага сабаку. Сашы давялося перанесці некалькі аперацый.

- Мужчына трымаў у сябе двух ратвейлераў - Шакці і Тошу, - распавяла суддзя суда Першамайскага раёна Віцебска Наталля Карабліна. - Аднаго з сабак ён аддаў свайму сябру. Ужо пасля таго, як вінаваты быў асуджаны, мы разглядалі пратакол аб адміністрацыйным правапарушэнні ўжо да новага гаспадара сабакі - сабака ўкусіў сяброўку ягонай жонкі.

Суд вынес пакаранне для ўладальніка ратвейлера, які пакусаў маладую жанчыну: 15 дзён арышту. Іх вінаваты ужо адбыў. Дарэчы, згодна з дзейным заканадаўствам, суд не можа абавязаць гаспадара ўсыпіць сабаку, нават калі ён нападае на людзей.

- Калі жывёліна пагражае жыццю або здароўю людзей, супрацоўнік міліцыі можа ўжыць у дачыненні да яго зброю, каб абясшкодзіць, - патлумачыла Наталля Карабліна. - Калі б міліцыянты былі на месцы здарэння, калі сабакі кусалі дзяўчыну, яны маглі б прыстрэліць сабак. У іншых выпадках жывёлу можна ўсыпіць толькі з добрай волі гаспадара.