Лукашэнка: Абы-якая работа Міністэрства адукацыі!
79- 29.09.2014, 19:07
- 40,119
(абноўлена) Правадыр выказаў незадаволенасць зместам школьных праграм некаторых прадметаў.
Пра гэта Лукашэнка заявіў 26 верасня на сустрэчы з чальцамі Савета «палаты прадстаўнікоў», паведамілі charter97.org у прэс-службе дыктатара.
«Няўжо мы не можам тут навесці парадак?! Абы-якая праца Міністэрства адукацыі! Занадта шмат ёсць нараканняў», - падкрэсліў Лукашэнка.
Правадыр пры гэтым адзначыў, што гаворка не ідзе аб патрэбе карэннай ломкі ў сферы адукацыі, а толькі аб навядзенні парадку і удасканаленні ў тых ці іншых кірунках. «Пастаўленае пытанне аб аптымізацыі ў адукацыі. У нас столькі лішняга, і абсалютна ніхто не лічыць грошы», - сказаў ён.
Паводле слоў Лукашэнкі, цяпер вывучаецца сітуацыя і ў сферы сярэдняй адукацыі, дзе таксама стае хібаў. У якасці прыкладу Лукашэнка падаў школьную праграму, у якой расейскай і нават ангельскай мове адводзіцца больш гадзін, чым беларускай.
«Добра, на расейскай мове мы практычна ўсе размаўляем. Але на беларускай мове, скажам шчыра, у побыце, дома мы размаўляем менш. Дык, можа быць, трэба ў школе на карысць беларускай мовы даць адну гадзіну, а не ангельскай?» - адзначыў дыктатар.