За СМС аб «мінаванні» - 9 гадоў калоніі

Фігурант справы аб СМС-мінаванні менскага метро атрымаў дзевяць гадоў папраўчай калоніі ўзмоцненага рэжыму.

Мужчына прызнаны вінаватым ва ўчыненні злачынстваў, прадугледжаных ч.2 арт.166, ст.168, ч.2 ст.343 і ч.2 арт.340 КК Беларусі. Прысуд можа быць абскарджаны ва ўстаноўленым законам парадку, паведамляе БелТА.

Як паведамлялася, 34-гадовы жыхар Менскай вобласці адправіў з мабільнага тэлефона паведамленне аб наяўнасці ў яго выбуховага прыстасавання і намеры падарваць яго ў метрапалітэне. Адпраўленае СМС-паведамленне ўтрымлівала наступны тэкст: «У мяне бомба, я ў метро, дзе падарваць, код актывацыі падкажы».

На час спецыяльных мерапрыемстваў у праверцы інфармацыі праца метро перарывалася на некалькі гадзін, а ў графік працы гарадскога пасажырскага транспарту ўносіліся істотныя змены. Факт існавання выбуховага прыстасавання, якое магло б пагражаць жыццю і здароўю людзей, не пацвердзіўся. Падазраваны быў затрыманы ў выніку аператыўна-вышуковых мерапрыемстваў. Нанесеная злачынствам шкода ацэньваецца больш чым у Br90 млн.

Акрамя таго, падчас расследавання атрыманыя звесткі аб чыненні абвінавачаным іншых крымінальна каральных дзеянняў - згвалтаванне заведама непаўналетняй, іншыя дзеянні сексуальнага характару з асобай, якая не дасягнула шаснаццацігадовага ўзросту, дэманстрацыя загадзя непаўналетняму відэафільмаў парнаграфічнага зместу. У тым ліку з гэтай прычыны за ўсё паводле справы праведзена 14 экспэртыз, у прыватнасці, тры комплексныя судовыя псіхіятрычныя. На думку экспэртаў, у абвінавачанага ёсць псіхічныя адхіленні. Таксама ўстаноўленыя факты злоўжывання алкаголем.