Выбух у кватэры ў Высокім: 25-гадовы мужчына атрымаў апёкі
1- 27.01.2015, 12:00
- 7,199
Увечары 26 студзеня выратавальнікам паступіла паведамленне аб выбуху ў пяціпавярховым жылым доме на вуліцы Будаўнікоў у горадзе Высокае.
На чацвёртым паверсе дома адбылася ўспышка газавай сумесі без наступнага гарэння, піша БелаПАН.
У выніку 25-гадовы мужчына атрымаў апёкі твару і абедзвюх кісцяў рук 2-3-й ступені. Пацярпелы шпіталізаваны ў апёкавае аддзяленне Берасцейскай абласной бальніцы. Ягоны стан сярэдняй ступені цяжкасці.
Ад выбуху таксама пацярпелі чатыры кватэры ў доме. У кватэры на чацвёртым паверсе, дзе знаходзіўся 25-гадовы пацярпелы, пашкоджаныя міжпакаёвыя дзверы, а таксама міжпакаёвая перагародка з пенаблокаў. У кватэры на трэцім паверсе пашкоджаныя ўваходныя дзверы і шкленне гаўбца. У кватэры на пятым паверсе пашкоджаныя ўваходныя дзверы, яшчэ ў адной на гэтым жа паверсе - уваходныя дзверы і шкленне міжпакаёвых дзвярэй. Гаспадары гэтых кватэр не пацярпелі.
Прычына ўспышкі газавай сумесі высвятляецца. Паводле папярэдняй інфармацыі, у кватэры, дзе адбылася ўспышка, вяліся рамонтныя працы.
Фота: МНС