Міхаіл Парэчанкаў: «Я сам абвяшчу ў вышук СБУ»
64- 28.01.2015, 16:22
- 52,088
Скандальны актор заявіў, што «Украіна вельмі агрэсіўная ў дачыненні да Расеі».
Служба бяспекі Ўкраіны абвясціла расейскага актора Міхаіла Парэчанкава, які страляў па ўкраінскіх вайскоўцах у Данбасе, у вышук. Супраць артыста вядзецца следства паводле артыкула «Тэрарыстычны акт або пагроза ягонага ўчынення».
- Што вось мне рабіць? Я магу іх сам аб'явіць у вышук. Гэта дурная сітуацыя. Я буду жыць і працаваць далей, - паведаміў LifeNews Міхаіл Парэчанкаў.
Актор, які падтрымаў баевікоў, дадаў, што ўлады Украіны нібыта агрэсіўна настроеныя ў дачыненні да Расеі.
- З чым гэта можа быць звязана? З хворай галавой, напэўна. Я думаю, хвароба пройдзе і будзе ўсё нармальна. У мяне няма ніякіх спраў на Украіне, таму што краіна ў вельмі агрэсіўным становішчы. Вы бачыце, што творыць гэты вар'яцкі рэжым? - адзначыў Парэчанкаў.
Нагадаем, расейскі кінаактор Міхаіл Парэчанкаў у канцы кастрычніка прыехаў у Данбас з паказальнымі «выступамі».
Ён прыбыў на агнявыя пазіцыі тэрарыстаў у Данецкім аэрапорце і дэманстратыўна на камеры адкрыў агонь па пазіцыях сіл антытэрарыстычнай аперацыі. На галаве расейскага актора была каска з надпісам «Прэса».