У Кіраўніцтва спраў Лукашэнкі з'явіўся свой малаказавод

У валоданні КСП з'явіцца кампанія "Малочны гасцінец", створаная на базе менскага гармалзавода №2.

У хуткім часе на адну бізнэс-адзінку ў Кіраўніцтве спраў Лукашэнкі Беларусі стане болей, паведамляе tut.by.

Як вынікае з пастановы ўрада Беларусі №39 ад 23 студзеня 2015 года, "Менскаму малочнаму заводу № 1" да 31 сакавіка варта перадаць на бязвыплатнай аснове ва ўласнасць Рэспублікі Беларусь свае філіялы "Юнік-Агра" і "Малочны гасцінец" як маёмасныя комплексы. Кошт "Юнік-Агра" ацэнены ў 75,3 млрд. рублёў, "Малочны гасцінец" (былы гармалзавод №2) - 424,5 млрд. рублёў.

Гэтыя структуры сфармуюць рэспубліканскае вытворча-гандлёвае ўнітарнае прадпрыемства "Малочны гасцінец".

Цікава, што ААТ "Юнік-Агра" і ААТ "Гармалзавод № 2" былі ўключаныя ў склад ААТ "Менскі малочны завод № 1" на правах філіялаў у верасні 2014 года. "Гэтае аб'яднанне дазволіць пашырыць асартымент выпусканай прадукцыі, асвоіць новыя віды прадукцыі, павялічыць аб'ём продажаў, выйсці на новыя рынкі збыту, а таксама замацаваць сваё становішча на рынку Беларусі", - гаварылася ў афіцыйным паведамленні кампаніі.

- Наш завод дынамічна развіваецца. У нас вырабляецца 300 відаў прадукцыі. Мы займаем 50% на рынку менскай "малочкі", гэта значыць кожны другі малочная выраб на паліцах сталічных крам - нашай вытворчасці. Думаем, і ў далейшым будзем утрымліваць такі высокі ўзровень, - сказалі на ММЗ №1.

- ААТ "Гармалзавод № 2" было ліквідаванае 1 верасня пасля ўваходжання ў склад першага завода на правах філіяла. Нядаўна вышэйшыя структуры вырашылі, што рэспубліканская форма ўласнасці для другога завода будзе вялікім дабром, больш камерцыйна мэтазгодным. Таму яно перайшло пад юрысдыкцыю Кіраўніцтва спраў Лукашэнкі, - распавялі профільныя крыніцы.

Пасля прыходу ў КСП у пачатку 2013 года Віктара Шэймана бізнэс-структура ўзяла пад кантроль некалькі актываў. Напрыканцы 2013 года да Кіраўніцтва спраў Лукашэнкі перайшоў "Агракамбінат "Мачулішчы", якім раней кіраваў Нацбанк. 21 красавіка мінулага года Кіраўніцтва спраў Лукашэнкі стала новым уласнікам "Парытэтбанка".

КСП было недаступнае для каментароў.