Рассельгаснагляд зноў злавіў Беларусь на кантрабандзе

Выяўлены новы канал кантрабанды рыбнай прадукцыі з ласося з краін Еўразвязу праз Беларусь.

Падчас сумеснай праверкі Рассельгаснаглядам і ветэрынарнай і харчовай службай Ісландыі было выяўлена, што частка ветэрынарных сертыфікатаў на рыбную прадукцыю, якая паступае з Ісландыі ў Беларусь, завераная подпісам інспектара, які звольніўся з гэтага ведамства Ісландыі яшчэ ў 2011 годзе, паведамляе "Інтэрфакс-Захад".

Але ў суправаджэнні такіх сертыфікатаў толькі ў лістападзе-снежні 2014 года ў Беларусь паступіла 19 партый рыбнай прадукцыі вагой больш за 360 тон. У гэтым годзе ў адрас аднаго з беларускіх атрымальнікаў ужо паспела прыйсці тры партыі рыбнай прадукцыі вагой больш за 60 тон у суправаджэнні падробных ветэрынарных сертыфікатаў.

"Асаблівую заклапочанасць Рассельгаснагляду выклікае тая акалічнасць, што паводле звестак, занесеных беларускімі інспектарамі ў электронную сістэму "Аргус", некаторыя фальсіфікаваныя сертыфікаты датаваліся 31 студзеня 2015 года, і гэта не прыцягнула ўвагі беларускіх службовых асобаў, - гаворыцца ў паведамленні. - Гэта можа сведчыць аб нядобрасумленным выкананні асобнымі інспектарамі ветэрынарнай службы Беларусі сваіх абавязкаў ва ўнясенні звестак у электронныя сістэмы ЕАЭС або аб супрацьпраўнай змове эканамічна матываваных чыноўнікаў з недобрасумленнымі ўдзельнікамі замежнаэканамічнай дзейнасці".

У Рассельгаснаглядзе "вельмі заклапочаныя сітуацыяй, якая склалася" і маюць намер бліжэйшым часам правесці кансультацыі з кампетэнтнымі службамі Ісландыі і Беларусі ў захадах, якія будуць спрыяць стварэнню сістэмы, якая рэальна гарантуе бяспеку пры пастаўках рыбнай прадукцыі.

У паведамленні таксама адзначаецца, што першы кантрабандны канал паставак рыбнай прадукцыі з ЕЗ быў перакрыты ў лістападзе мінулага года.

Пастаўкі рыбы і рыбнай прадукцыі з краін ЕЗ забароненыя ў рамках харчовага эмбарга, уведзенага з 7 жніўня 2014 года.