Беларускіх чыноўнікаў замацавалі за рынкамі збыту
27- 30.01.2015, 16:38
- 14,756
Урад Беларусі замацаваў высокапастаўленых дзяржслужачых за краінамі і рэгіёнамі свету з мэтай нарошчвання аб'ёмаў экспарту.
Адпаведнае рашэнне замацаванае ў пастанове Савета міністраў №34.
Згодна з пастановай прэм'ер-міністру Андрэю Кабякову даручана праводзіць агульную каардынацыю ў прасоўванні экспарту ў Расею і СНД, паведамляе БелаПАН.
Першы віцэ-прэм'ер Васіль Мацюшэўскі вызначаны адказным за экспарт у краіны Еўразійскага эканамічнага саюза.
Былы прэм'ер-міністр, старшыня «савета рэспублікі» Нацыянальнага сходу Міхаіл Мясніковіч будзе адказваць за экспарт у Індыю, Бангладэш, Туркменістан і Новасібірскую вобласць РФ.
Старшыня «палаты прадстаўнікоў» Уладзімір Андрэйчанка вызначаны адказным за экспарт у Камбоджу, В'етнам, Лаос, М'янму, Тайланд.
Старшыня праўлення Нацыянальнага банку Беларусі Павел Калавур будзе адказваць за экспарт у Эфіопію і Кенію.
Акрамя гэтага, экспартныя рынкі збыту беларускай прадукцыі размеркаваныя паміж беларускімі міністрамі, старшынямі аблвыканкамаў і канцэрнаў.
Варта адзначыць, што ў 2014 годзе дзяржорганы не змаглі выканаць прагнозныя параметры павелічэння экспарту беларускай прадукцыі.
Напрыклад, рост экспарту прадпрыемстваў Мінпрама прагназаваўся на ўзроўні 16-16,2%, а фактычна за студзень-лістапад ён знізіўся на 16,1%. Перад Мінсельгасхарчам ставілася задача павялічыць у 2014 годзе экспарт на 12,8-12,9%, тады як за студзень-лістапад гэты паказчык знізіўся на 4,5%.